भंडारा : पोलिसांच्या खांद्याला खांदा लावून काम करणारे होमगार्ड हेही कोरोना काळात योद्धा म्हणून कर्तव्य बजावत आहेत. मात्र, शासनाच्या नियमानुसार ५० पेक्षा जास्त वय असलेल्या होमगार्डला ड्युटी मिळणार नसल्याने जिल्ह्यातील १३७ होमगार्ड बांधवांवर बेरोजगारीची कुऱ्हाड कोसळली आहे.
जिल्ह्यात निवडणुका असो की कोणताही धार्मिक उत्सव, रॅली, सभा, राजकीय नेतेमंडळींचे दौरे कोणत्याही कार्यक्रमाचा बंदोबस्त असल्यास पोलिसांच्या मदतीसाठी तसेच बंदोबस्तासाठी होमगार्डची सेवा घेतली जाते. जिल्ह्यात महिला होमगार्डही कार्यरत आहेत. मात्र जेवढे दिवस उपस्थित रहावे लागते तेवढेच मानधन त्यांना वितरित केले जाते. मिळणारे मानधनही तुटपुंजे असल्याने शासनाने होमगार्ड बांधवांचे मानधन वाढविण्याची मागणी होत आहे.
असे असले तरीही पोलीस प्रशासनातर्फे होमगार्ड बांधवांचे मानधन वेळेत निघण्यासाठी वरिष्ठ अधिकारी प्रयत्नरत असतात. त्यातही कोरोना काळात होमगार्ड बांधवांची गैरसोय होणार नाही यासाठी अधिकाऱ्यांकडून स्वतः देखरेखीत कामकाज पाहिले जाते. तसेच होमगार्ड बांधवांना येणाऱ्या विविध अडचणी त्यांच्या मदतीने सोडविल्या जात आहेत. मात्र, शासन स्तरावर मानधन वाढीची मागणी होमगार्ड बांधवांमधून होत आहे.
बॉक्स
७१९ होमगार्ड बांधवांना कोरोना लसीकरण
जिल्ह्यातील ८०५ नोंदणीकृत होमगार्डपैकी ७१९ होमगार्डना कोरोनाची लस मिळाली आहे. सध्या ५०० होमगार्ड सेवेत आहेत. तर ५० पेक्षा जास्त वय असलेले १३७ होमगार्ड आहेत. त्यात जिल्ह्यात महिला होमगार्डची संख्या ९४ आहे. जिल्ह्यात विविध उत्सवांच्या काळात या होमगार्डनी आपले कर्तव्य निभावले आहे. त्यामुळे यांचे मानधन वेळेत निघावे यासाठी अप्पर पोलीस अधीक्षक अनिकेत भारती यांचे विशेष लक्ष असते.
कोट
पोलिसांच्या बरोबरीने आम्ही कर्तव्य निभावत आहोत. शासनाने पोलीस भरतीमध्ये होमगार्डना प्रथम प्राधान्य दिले पाहिजे. यासोबतच आम्हांला दर महिन्याला फिक्स वेतन सुरू करावे, अशी आमची मागणी आहे.
एक होमगार्ड
कोट
अनेकदा बंदोबस्तासाठी घरापासून काही दिवस बाहेर रहावे लागते. अशावेळी खाण्यापिण्यासह पेट्रोलवर होणारा खर्च वाढला आहे. त्यामुळे शासनाने होमगार्ड बांधवांचे मानधन वाढवून निवृत्ती वेतन सुरू करण्याची गरज आहे.
एक होमगार्ड.
कोट
होमगार्डला अल्प मानधन मिळते. त्यातच आमच्या कुटुंबाचा उदरनिर्वाह चालतो. ही वस्तुस्थिती आहे. मात्र, गेल्या अनेक वर्षांपासूनची असणारी मानधन वाढीची मागणी शासनाने पूर्ण केली नसल्याने होमगार्ड ऑफिसमध्ये शासनाबद्दल संताप व्यक्त होत आहे.
एक होमगार्ड.