‘सायबर’कडे ३१ तक्रारी : ब्रेकअपनंतरही सोशल मीडियावर केली जाते बदनामी
बीड : मुलींना, महिलांना सोशल मीडियावरून ट्रोल केले जाते. बऱ्याचदा मेसेंजर, इन्स्टाग्राम फेसबुक व इतर सोशल मीडियावरून एकप्रकारे पाठलाग केला जातो. काही प्रकरणांत तर रिलेशनशिपमध्ये ब्रेकअप झाल्यानंतर सूड उगविण्यासाठी सोशल मीडियावर खाजगी फोटो, व्हिडिओदेखील पसरविले जातात. या प्रकरणांमध्ये कारवाई होऊन गुन्हेदेखील दाखल झालेले आहेत, तसेच शिक्षादेखील झालेली आहे.
महिलांना अशा प्रकारे बनावट अकाउंटवरून छळ करणे, त्रास देणाऱ्या ३१ तक्रारी सायबर सेलकडे प्राप्त झाल्या आहेत. त्यावर कारवाईदेखील करण्यात आली आहे, तर काही प्रकरणांत गुन्हे दाखल करून आरोपीला अटक केली आहे. त्यामुळे अशा प्रकारे महिलांची सोशल मीडियावर बदनामी करणे महागात पडू शकते. कायदेशीर कारवाई झाल्यानंतर मोठी शिक्षा होते. याचे भान तरुण पिढीने ठेवले पाहिजे. सायबर सेलकडूनदेखील अशा बनावट अकाउंटवर कायम लक्ष ठेवलेले असते.
तक्रार न करणाऱ्यांची संख्या अधिक
आधुनिक युगातही महिला व मुली स्वत:ला सुरक्षित करण्यासाठी होणारा छळ मुकाटपणे सहन करतात.
महिला, मुलींना अजूनही बदनामीची भीती वाटते. त्यामुळे आरोपींचे फावते. बिनधास्तपणे तक्रार करण्यास त्यांनी पुढे आले पाहिजे.
अशा प्रकरे होतो छळ
घाणेरडे मेसेज पाठविणे
फोटो एडिट करणे
बनावट अकाउंट तयार करणे
अश्लील इमोजी
वारंवार मिस्ड कॉल देणे
फोटो, व्हिडिओ व्हायरल करणे
महिला, मुलींनी समाजमाध्यमांत मत व्यक्त केले की, त्यांना ट्रोल केले जाते. सोशल मीडियावरून त्रास दिला जातो. यामध्ये अश्लील व अयोग्य भाषा असेल, तर कायदेशीर कारवाई केली पाहिजे
सुशीला मोराळे, सामाजिक कार्यकर्त्या
मुली व महिलांनी तक्रार दाखल करावी
मोबाइल, सोशल मीडिया व इतर साधनांचा वापर करून महिलांना छळणाऱ्यांची गय केली जात नाही. त्यामुळे अशा प्रकारे बदनामी केल्यास संबंधितांविरुद्ध पोलिसांत तक्रार करावी, पुढील कार्यवाही केली जाते.
सायबर सेल प्रमुख, बीड
येथे करा तक्रार
१ महिलांकरिता दामिनी पथक व भरोसा सेल आहे. तेथे त्या थेट तक्रार करू शकतात
२ महिलांसाठी विशेष हेल्पलाइन नंबर आहे. अन्यथा १०० नंबरवरदेखील कॉल केल्यास प्रतिसाद मिळतो.
३ थेट पोलीस ठाण्याकडून तक्रार केल्यास आरोपीविरुद्ध ठोस कारवाई करणे शक्य होते.
सायबर सेलकडील तक्रारी
२०१९ -८२
२०२० ८६
२०२१ १२४
महिलांच्या २०२१ तक्रारी ३१