बीड : दहावीनंतर कमी कालावधीत शिक्षण आणि हमखास रोजगाराची संधी म्हणून विविध ट्रेडचे प्रशिक्षण घेण्याकडे ग्रामीण तसेच शहरी भागातील विद्यार्थ्यांचा ओढा कायम आहे. औद्योगिक प्रशिक्षण संस्थेत प्रवेशासाठी १५ जुलैपासून ऑनलाइन आवेदन भरण्याची प्रक्रिया सुरू झाली असून २७ जुलैपर्यंत जिल्ह्यात २५११ अर्ज आले त्यापैकी २१८० अर्जांची नोंदणी निश्चित झाली आहे. या शिक्षणासाठी २०१३ पासून ऑनलाइन प्रवेश प्रक्रियेमुळे मानवी हस्तक्षेप टळून गुणवत्तेच्या बळावर विद्यार्थ्यांना प्रवेश सुलभ झाले. तसेच प्रशिक्षित निदेशकांचा स्टाफ, आवश्यक यंत्रसामुग्रीची उपलब्धता, मिळणारी शिष्यवृत्ती यामुळे हे शिक्षण खर्चिक नसल्याने करिअर सहज करता येत असल्याने ग्रामीण विद्यार्थ्यांचा कल या शिक्षणाकडे वाढल्याचे दिसते. कोरोनाची दुसरी लाट ओसरली आहे. विद्यार्थ्यांसाठी हे प्रशिक्षण सुवर्णसंधी असून यंदा संपूर्ण जागा भरल्या जातील. सर्व इच्छुक उमेदवारांनी नजीकच्या औद्योगिक प्रशिक्षण संस्थेत संपर्क करून नोंदणी करावी, असे आवाहन शासकीय औद्योगिक प्रशिक्षण संस्थेचे प्राचार्य अतुल केसकर, उपप्राचार्य एस. जी. कुमावत, गटनिदेशक श्रीकांत रायते, पवन रामदासी, जे. एम. क्षीरसागर यांनी केले आहे.१) एकूण किती जागा - ३४३६
आतापर्यंत आलेले अर्ज - २५११
जिल्ह्यातील शासकीय संस्था - १२
जागा -- २१६६
खासगी संस्था - १३
जागा - १२८० २) सर्वांनाच हवा ‘फिटर’
वीजतंत्री, तारतंत्री, मोटार मेकॅनिक, डिझेल मेकॅनिक, टर्नर , फीटर या ट्रेडकडे विद्यार्थ्यांचा ओढा मागील काही वर्षांपासून वाढला आहे. बीटीआरआयमार्फत मागील वर्षी ३० कॅम्पस इन्टरव्यूहमधून ४०० ते ५०० जणांना अप्रेन्टीसशिपची संधी मिळाली. तर काळाच्या बदलत्या प्रवाहात मात्र सुतारकाम, गवंडी, साचेकार या ट्रेडकडे ओढा कमी झाल्याचे दिसते.
३) आयटीसाठी अर्ज केलेले दोन विद्यार्थ्यांच्या प्रतिक्रिया
मला आवड असल्याने मी मागील वर्षी इलेक्ट्रॉनिक्स ट्रेड निवडला. आकाशवाणी, पोलीस वायरलेस विभाग व अन्य ठिकाणी नोकरीची संधी मिळते. भविष्यात व्यवसायाच्या दृष्टीनेही स्कोप असल्याने हा ट्रेड निवडला. प्रशिक्षणही चांगले मिळत आहे. -- ज्ञानेश्वर बबन खोले, विद्यार्थी, बीड.
----------
मागील वर्षी मी मोटार मेकॅनिक कोर्स निवडला. आवड तर आहेच पण एस. टी. आर्मी, पोलीस वर्कशॉप, रेल्वे, एअरपोर्ट ॲथोरिटीमध्ये संधी आहे. निदेशक म्हणून काम करता येईल, त्यामुळे या ट्रेडचे शिक्षण घेत आहे. -- विशाल गोरख आखाडे, विद्यार्थी, बीड.
----------
४) मागील वर्षी २० टक्के जागा रिक्त
मागील वर्षी औद्योगिक प्रशिक्षण संस्थांमध्ये जिल्ह्यात २० टक्के जागा रिक्त राहिल्या होत्या. कोरोना महामारीची साथ तसेच आरक्षणाच्या प्रश्नामुळे वेळीच निर्णय होऊ शकला नाही. त्यामुळे दोन ते अडीच महिन्यांचे अंतर पडले.
--------------