संजय खाकरे
लोकमत न्यूज नेटवर्क
परळी : सध्या कोरोनामुळे गर्दी कमी असल्याने परळी येथील रेल्वे स्थानकात प्लॅटफॉर्म तिकीट आकारण्यात येत नाही. गेल्या दीड वर्षात यातून होणारे उत्पन्नही शून्य आहे. पूर्वी प्लॅटफॉर्म तिकीट १० रुपये आकारण्यात येत होते.
परळी रेल्वे स्थानकात रेल्वे पोलिसांची गस्त असते. त्यामुळे विनाकारण प्रवासी फिरत नाहीत. सध्या प्रवाशांसोबत आलेल्या नातेवाईकांनाही प्लॅटफॉर्म तिकीट आकारण्यात येत नाही. कोरोनाच्या पार्श्वभूमीवर पंधरा महिन्यांपासून अनेक पॅसेंजर व काही एक्सप्रेस रेल्वे गाड्या बंद असल्यामुळे रेल्वे स्थानकात प्रवाशांची जास्त गर्दी होत नाही. परंतु कधीकधी अनेक टवाळखोर येथे येतात. त्याचा प्रवाशांना त्रास होतो. यासाठी व गर्दी टाळण्यासाठी प्लॅटफॉर्म तिकीट आकारावे, अशी मागणी सामाजिक क्षेत्रातील नागरिकांतून होत आहे.
.....
परळी रेल्वे स्थानकातून दररोज आठ गाड्या धावतात.
हैदराबाद-औरंगाबाद, औरंगाबाद-हैदराबाद, नांदेड-बंगळूरू, बेंगळुरू-नांदेड, काचीगुडा-शिर्डी, शिर्डी-काचीगुडा या रेल्वे गाड्या सुरू आहेत. त्यातच आता गेल्या शुक्रवारपासून औरंगाबाद-रेणुगुंठा ही साप्ताहिक रेल्वे गाडी सुरू झाली आहे. तर सिकंदराबाद-शिर्डी व शिर्डी -सिकंदराबाद ही रेल्वे पूर्वीप्रमाणे सुरू करण्यात आली आहे. एकंदरीत रोज आठ रेल्वेगाड्या या स्थानकातून जात आहेत.
....
प्रवाशांची संख्या वाढतेय
आता प्रवाशांची संख्या वाढू लागली आहे. परळी रेल्वे स्थानकातून दररोज सातशे प्रवासी जातात. हैदराबाद-औरंगाबाद औरंगाबाद-हैदराबाद, नांंदेड -बेंगळुरू, बेंगळुरू- नांदेड या रेल्वे गाड्यांना प्रवाशांची संख्या जास्त आहे. मार्च २०२० पासून परळी रेल्वेस्थानकमार्गे जाणाऱ्या सर्व पॅसेंजर गाड्या बंद आहेत. महाराष्ट्र अनलॉक झाला असला तरी पॅसेंजर रेल्वे गाड्या अद्याप सुरू झालेल्या नाहीत. त्यामुळे प्रवाशांची गैरसोय होत आहे. प्रवाशांना बस, ट्रॅव्हल्सने प्रवास करावा लागत आहे. नांदेड-पनवेल, पनवेल- नांदेड रेल्वे ही गाडी बंद आहे. या रेल्वे गाड्या पूर्ववत सुरू कराव्यात, अशी मागणी जोर धरू लागली आहे.
....
कोरोनामुळे प्लॅटफॉर्म तिकीट आकारण्याचा वरिष्ठ कार्यालयाकडून आदेश नाही. जेव्हा आदेश येतील तेव्हा प्लॅटफॉर्म तिकीट घेण्यात येईल. कोरोनापूर्वी प्लॅटफॉर्म तिकीट १० रुपये आकारण्यात येत होते. ते सध्या बंद आहे.
-जितेंद्रकुमार मीना, रेल्वे स्टेशन मास्तर, परळी.
....
परळी रेल्वे स्थानकात विनाकारण फिरणाऱ्यांची संख्या अधूनमधून मोठ्या प्रमाणात दिसून येते. त्यास आळा बसावा म्हणून प्लॅटफॉर्म तिकीट आकारावे.
- सेवकराम जाधव, सामाजिक कार्यकर्ते, परळी.
....
स्थानकातून रोज धावणाऱ्या रेल्वे-८
रोजच्या प्रवाशांची संख्या-७००
प्लॅटफॉर्म तिकिटातून कमाई-०
...