केजमध्ये पिसाळलेल्या कुत्र्याचा धुमाकूळ; एकाच दिवशी ४० जणांना चावा, नागरिकांमध्ये भीती

कुत्र्याचा दिसेल त्याला घेतला चावा; संतप्त नागरिकांचा नगर पंचायतीच्या कार्यालयात मोकाट कुत्रे सोडण्याचा इशारा

केज : येथील नगर पंचायतीच्या दुर्लक्षामुळे सोमवारी एका पिसाळलेल्या कुत्र्याने तब्बल ४० नागरिकांना चावा घेतल्यामुळे शहरात भीतीचे वातावरण पसरले आहे.

सोमवारी या कुत्र्याने बसस्थानक परिसरात अक्षरशः धुमाकूळ घातला. दिसेल त्या व्यक्तीला हा कुत्रा चावा घेत होता. बसस्थानक परिसरासह मंगळवारपेठ, अजिजपुरा, भीमनगर, रोजा मोहल्ला भागातही या कुत्र्याने अनेकांना चावा घेऊन धुमाकूळ घातला. एक ते दोन तासांत तब्बल ४० जणांना कुत्र्याने चावा घेतल्यामुळे खळबळ उडाली. कुत्रा चावल्याने जखमी रुग्णांची येथील उपजिल्हा रुग्णालयात रेबीज इंजेक्शन घेण्यासाठी सोमवारी रांग लागली होती.

जखमी रुग्णांवर उपचारसोमवारी पिसाळलेल्या कुत्र्याने तब्बल ४० जणांना चावा घेतला होता. या सर्व जखमी रुग्णांना केज येथील उपजिल्हा रुग्णालयात रेबीज इंजेक्शन दिल्याचे व दहा रुग्णांना कुत्र्याने जास्त ठिकाणी चावा घेतल्यामुळे त्यांना पुढील उपचारासाठी स्वाराती रुग्णालयात पाठविल्याचे वैद्यकीय अधीक्षक डॉ. दत्तात्रय केंद्रे यांनी ‘लोकमत’ला सांगितले.

कार्यालयात मोकाट कुत्रे सोडणार..!केज शहरातील मोकाट फिरणाऱ्या कुत्र्यांचा बंदोबस्त नगर पंचायतीने करण्याची मागणी केज विकास संघर्ष समितीने केली आहे. याची दखल त्यांनी न घेतल्यास नगर पंचायतीच्या कार्यालयात शहरातील सर्व मोकाट कुत्रे आणून सोडण्याचा इशारा समितीचे तालुकाध्यक्ष प्रा. हनुमंत भोसले यांनी दिला.

कुत्रा चावल्यास काय करावे?तात्काळ जखम धुवा: कुत्रा चावल्यानंतर ती जागा नळाच्या वाहत्या पाण्याखाली साबणाने किमान १० ते १५ मिनिटे स्वच्छ धुवावी.घरगुती उपचार टाळा: जखमेवर मिरची, हळद किंवा तेल लावणे टाळावे.रेबीज इंजेक्शन: वेळ न घालवता २४ तासांच्या आत जवळच्या शासकीय रुग्णालयात जाऊन रेबीज प्रतिबंधक लस घ्यावी.निरिक्षण: चावा घेणाऱ्या कुत्र्यावर १० दिवस लक्ष ठेवावे.