अंबाजोगाई : स्वातंत्र्यसंग्राम सेनानी जवाहरलालजी दर्डा उपाख्य बाबूजी यांच्या जयंतीनिमित्त ‘लोकमत रक्ताचं नातं’ या रक्तदान मोहिमेंतर्गत सोमवारी ५ जुलै रोजी अंबाजोगाई येथील स्वामी रामानंद तीर्थ रुग्णालयाच्या रक्तपेढीत सकाळी १० वाजता रक्तदान शिबिरास प्रारंभ होणार आहे. शहरातील विविध सामाजिक संघटना व रक्तदात्यांनी या मोहिमेत सहभाग नोंदवावा, असे आवाहन लोकमत परिवाराच्या वतीने करण्यात आले आहे.
कोरोना विषाणू संसर्गाच्या संकट काळात रक्तदानाचे कार्य बहुतांशी थांबले होते. त्यामुळे रक्ताची कमतरता जाणवायला लागली. ती भरून काढण्यासाठी ‘लोकमत’ने पुढाकार घेतला असून २ जुलै ते १४ जुलै या कालावधीत ‘लोकमत रक्ताचं नातं’ ही अभिनव मोहीम हाती घेण्यात आली आहे.
रक्तदानासाठी यांचे आवाहन
अंबाजोगाई तालुक्यात या मोहिमेत भारतीय जैन संघटना, रोटरी क्लब ऑफ अंबाजोगाई सिटी, निवासी डॉक्टरांची मार्ड ही संघटना, शिक्षक मैत्री प्रतिष्ठान, श्रीराम जन्मोसत्व समिती, राष्ट्रीय छात्र सेना, अशोक कचरे मित्रमंडळ, ॲड. किरण भालेकर मित्रमंडळ, आधार माणुसकीचा ग्रुप, श्रमकरी ग्रुप देवळा, बसव ब्रिगेड संघटना, पेशवा युवा व महिला मंच, रोटरी इनर्व्हील क्लब यांच्यासह विविध सामाजिक संघटना, सामाजिक कार्यकर्ते या रक्तदानाच्या मोहिमेत सहभागी होणार आहेत. ज्यांना रक्तदान करायचे आहे, त्यांनी अविनाश मुडेगावकर-9922402463 या क्रमांकावर संपर्क साधावा.. असे आवाहन लोकमत परिवाराच्या वतीने करण्यात आले आहे.
गेल्या काही दिवसांपासून रक्ताची टंचाई निर्माण झाली आहे. अशा स्थितीत ‘लोकमत’ने हाती घेतलेल्या रक्तदान मोहिमेचे करावे तेवढे कौतुक कमीच आहे. या मोहिमेत आम्ही सहभागी आहोत, आपणही सहभागी व्हा. रक्तदानाच्या मोहिमेस बळ मिळण्यासाठी स्वयंस्फूर्तीने पुढाकार घेऊ
-धनराज सोळंकी
विभागीय उपाध्यक्ष, भारतीय जैन संघटना, अंबाजोगाई.
रक्तदान हेच आजच्या घडीला सर्वश्रेष्ठ दान असून समाजातील प्रत्येकाने त्यासाठी पुढे यायला हवे. ‘लोकमत रक्ताचं नातं’ या मोहिमेची अपेक्षित फलश्रुती होणारच आहे. आम्ही रक्तदान करून या मोहिमेत सहभागी होत आहोत. तुम्ही सहभागी व्हा.
- प्रा. रोहिणी पाठक,
सचिव, रोटरी क्लब, अंबाजोगाई.
अंबाजोगाई शहरातील स्वाराती रुग्णालयात सर्वच प्रकारच्या शस्त्रक्रिया मोठ्या प्रमाणावर होतात. या शस्त्रक्रिया करताना रक्ताची नितांत आवश्यकता असते. चला तर मग रक्तदान मोहिमेतून समाजाशी रक्ताचं नातं जोडू या.
- ॲड. संतोष पवार,
आधार माणुसकीचा, अंबाजोगाई.
नेकनूर येथे उद्या शिबिर
बीड : लोकमत समूह आणि अरविंद जाधव सामाजिक प्रतिष्ठान बालाघाट सर्कल आयोजित रक्तदान शिबराचे आयोजन सोमवारी ५ जुलै २१ रोजी नेकनूर येथे आयोजित केले आहे. नेकनूर येथील स्त्री व कुटीर रुग्णालयात सोमवारी सकाळी ९ ते सायंकाळी ५ वाजेपर्यंत हे शिबिर पार पडेल. सामाजिक कार्यकर्ते तर स्वामी विवेकानंद बहूद्देशीय सेवा संस्थेचे अरविंद जाधव आणि विशाल शिंदे यांच्या पुढाकाराने हे रक्तदान शिबिर होत आहे. शिबिरात रक्तदान करणाऱ्यांना लोकमततर्फे प्रमाणपत्र देण्यात येणार आहे. जास्तीत जास्त दात्यांनी रक्तदान करावे, असे आवाहन अरविंद जाधव, विशाल शिंदे आणि लोकमतच्या वतीने करण्यात आले आहे.
लोकमतचा हा उपक्रम स्तुत्य आहे. त्यासाठी आम्ही रक्तदान करणार, आपण रक्तदान करा.
अरविंद जाधव, विशाल शिंदे, जावेद पठाण.