परळी : तालुक्यातील सारडगाव येथील घाटात शुक्रवारी टँकर गुळाचा पाक सांडत गेल्याने रस्त्यावर अनेक दुचाकीस्वार घसरून पडले. त्यातच घाटात टेम्पो चालवताना नियंत्रण सुटल्याने चालक टेम्पोच्या केबिनमध्ये अडकून पडला. ही माहिती कळताच परळी ग्रामीणचे सहायक पोलीस निरीक्षक मारुती मुंडे व सहकाऱ्यांनी धाव घेत जेसीबीच्या साह्याने टेम्पोची केबिन व्यवस्थित करून अडकलेल्या वाहनचालकास अलगदपणे बाहेर काढले.
परळी तालुक्यातील सारडगाव येथील घाटात शुक्रवारी एक टँकर रस्त्यावर तीनशे मीटरपर्यंत गुळाचा पाक सांडत गेला. त्यामुळे रस्त्यावर येणाऱ्या व जाणाऱ्या दुचाकी घसरून पडत होत्या. याचदरम्यान रात्री नियंत्रण सुटल्याने टेम्पोचालकाचा पाय अडकल्याने तो जखमी झाला व टेम्पो थांबला. यावेळी केबिन काही प्रमाणात क्षतीग्रस्त झाली. शुक्रवारी मध्यरात्री परळी ग्रामीण पोलिसांचे कोम्बिंग ऑपरेशन सुरू होते. घाटातील टेम्पोची माहिती कळताच सपोनि मारुती मुंडे, जमादार नामदेव चाटे, विष्णू घुगे, होमगार्ड गाडे आपल्या सहकाऱ्यांसह तातडीने घटनास्थळी पोहोचले. त्यानंतर जेसीबी बोलावून टेम्पोची केबिन व्यवस्थित केली व अडकलेल्या टेम्पोचालकास बाहेर काढण्यात आले. टेम्पोमध्ये अडकलेल्या चालकास पायाला जखम झाल्याने त्याला येथील रुग्णालयात प्राथमिक उपचारानंतर औरंगाबाद येथे पाठविण्यात आले.