वडवणीतील शासकीय कार्यालये तहानलेलीच

राम लंगे , वडवणी यावर्षी निसर्गाने चांगली साथ दिली. मात्र अद्यापही पाण्याचा प्रश्न मार्गी लागलेला नाही. सध्या वडवणी शहरातील कुठल्याच शासकीय कार्यालयात कर्मचार्‍यांसह येणार्‍या सर्वसामान्य नागरिकांना पिण्याच्या पाण्याची सोय नसल्याने अनेक अडचणींचा सामना करावा लागत आहे. कर्मचार्‍यांना बाहेर जाऊन पाणी प्यावे लागत असले तरी अधिकार्‍यांनी मात्र स्वत:पुरती पाण्याची सोय केली आहे. अशा स्वार्थी अधिकार्‍यांबद्दल कर्मचार्‍यांमधून संताप व्यक्त केला जात आहे. येथील तहसील कार्यालय सोडता सर्वच शासकीय कार्यालये दुसर्‍याच्या जागेत आहेत. हक्काची जागा या कार्यालयांना अद्यापही मिळालेली नाही. एक तर हक्काची जागा नाही, त्यात आणखी या समस्यांचा सामना त्यामुळे अनेक अडचणींचा सामना करावा लागत आहे. तहसील कार्यालयात पिण्याच्या पाण्याची कुठलीच उपाययोजना नसून अधिकारी, कर्मचारी शासनाच्या पैशाने स्वत:ची तहान भागवत आहेत. बाटलीबंद पाण्याशिवाय हे अधिकारी पाणी पित नसल्याचे अनेकांनी सांगितले. मात्र या अधिकारी, कर्मचार्‍यांना तहसीलमध्ये विविध कामानिमित्त येणार्‍या सर्वसामान्य व्यक्तींची तहान भागविण्यासाठी उपाययोजना करण्यात यश आलेले नाही. स्वत: एसी रूममध्ये बसून सर्वसामान्यांना उन्हामध्ये उभे रहायला लावणार्‍या या अधिकारी, कर्मचार्‍यांवर मात्र वरिष्ठ अधिकार्‍यांचे साफ दुर्लक्ष होत असल्याचा आरोप सर्वसामान्यांमधून केला जात आहे. विशेष म्हणजे हे कार्यालय शहरापासून दूर असल्याने पिण्याचे विकत घ्यायचे म्हटले तरी मिळत नाही. येथील तहसीलमधील दलालांना अधिकारी, कर्मचारीच पाणी पिण्यासाठी देत असल्याचा आरोपही केला जात आहे. पंचायत समिती कार्यालय पंचायत समिती कार्यालयातही यापेक्षा काही वेगळी स्थिती नव्हती. पंचायत समिती कार्यालय हेसुद्धा किरायाच्या जागेतच चालते. येथेही सर्वसामान्य व्यक्तींच्या पिण्याच्या पाण्याची समस्या दूर करण्यात यश आलेले नाही. येथे येणार्‍या सर्वसमान्य नागरिकांना पिण्याच्या पाण्यासाठी परिसरातील खाजगी हॉटेलचा आधार घ्यावा लागत आहेत, तर काही जणांना पाणी विकत घेऊन पिण्याची वेळ आली आहे. अधिकार्‍यांच्या दुर्लक्षामुळे मात्र सर्वसामान्य नागरिकांना आर्थिक भुर्दंड बसत आहे. तालुका कृषी कार्यालय, सार्वजनिक बांधकाम विभाग, बसस्थानक, रजिस्टरी आॅफिस, सहायक निबंधक कार्यालय, बालविकास प्रकल्प कार्यालय, गटशिक्षणाधिकारी कार्यालय, तालुका आरोग्य कार्यालय, महावितरण कार्यालय, पशुवैद्यकीय रूग्णालय, प्राथमिक आरोग्य केंद्र आदी कार्यालये वडवणी शहरात आहेत. मात्र कुठल्याच कार्यालयात सर्वसामान्य नागरीकांच्या पिण्याच्या पाण्याची सोय करण्यात आलेली नाही. त्यामुळे सर्वसामान्यांचे हाल होत आहेत. याबाबत गटविकास अधिकारी सी.एम.ढोकणे म्हणाले, तहानलेल्या नागरिकांना पाणी देणे कर्तव्य समजून त्याच्या पिण्याची व्यवस्था सर्व शासकीय कार्यालयात करणे आवश्यक आहे. त्यांच्य पिण्याच्या पाण्याची सोय करावी.तहसील कार्यालयात दलालांना होतेय अधिकार्‍यांकडून पिण्याच्या पाण्याची सोय. सर्वसामान्यांना मात्र घ्यावा लागतोय खाजगी हॉटेलचा आधार. कुठल्याच शासकीय कार्यालयात नाही पिण्याच्या पाण्याची सोय दलालांऐवजी सर्वसामान्यांच्या पिण्याच्या पाण्याची सोय करण्याची होतेय मागणी महिलांचे होताहेत अधिक हाल. वरिष्ठांनी लक्ष देऊन समस्या सोडविण्याची होतेय मागणी.