बीड : जिल्हा रुग्णालयातील नर्सिंग हॉस्टेलमधील वीज तब्बल २७ मिनिटे गायब झाली होती. त्यामुळे ऑक्सिजन लावलेले रुग्ण घाबरले होते. हा प्रकार सोमवारी रात्री साडेआठ वाजेच्या सुमारास घडला. यामुळे लाखो रुपये खर्च करून खरेदी केलेले जनरेटर गेले कुठे, असा सवाल उपस्थित होत असून यानिमित्ताने पुन्हा एकदा जिल्हा रुग्णालयाचा आणखी एक अनागोंदी कारभार चव्हाट्यावर आला आहे.
कोरोनाबाधितांची रुग्णसंख्या वाढत असल्याने जिल्हा रुग्णालयात खाटा अपुऱ्या पडत होत्या. त्यामुळे बाजूच्याच नर्सिंग हाॅस्टेलमध्ये २०० ऑक्सिजन खाटांची व्यवस्था करण्यात आली. याच इमारतीत सोमवारी रात्री दुसऱ्या मजल्यावरील वीज गायब झाली होती. याच वाॅर्डमध्ये १० रुग्ण ऑक्सिजनवर होते. यातील तिघांना तात्काळ ऑक्सिजन लावण्यात आला, तर सात जणांचा ऑक्सिजन बंद पडला होता. रुग्णांनी आरडाओरड करण्यासह काही सुजाण नागरिकांनी ही माहिती सोशल मीडियावर टाकली. त्यानंतर हा प्रकार जिल्हाधिकारी रवींद्र जगताप यांना समजला. त्यांनी तात्काळ दखल घेतली. त्यानंतर वीज पुरवठा सुरळीत झाला. नोडल ऑफिसर डॉ. महेश माने यांनाही याची कल्पना देताच त्यांनी वॉर्डमध्ये धाव घेत परिस्थितीची माहिती घेतली. काही वेळासाठी वीज गेल्याचे त्यांनीही मान्य केले.
दरम्यान, कोरोनाच्या नावाखाली आराेग्य विभागाने लाखो रुपये खर्च करून जनरेटर खरेदी केलेले आहेत. अर्धा तास वीज गायब होऊनही आपत्कालीन स्थितीत जनरेटर नसणे ही खूप गंभीर बाब आहे. हाच प्रकार आयसीयु अथवा इतर वॉर्डमध्ये घडला असता, तर जबाबदार कोण? असा सवाल उपस्थित होत असून याची चौकशी करून यापुढे असा प्रकार होणार नाही, याची काळजी घेण्याबाबत सूचना कराव्यात, अशी मागणी होत आहे.