-----------------------
वॉर्डनिहाय लसीकरण
अंबाजोगाई : कोरोनाचे रुग्ण कमी होत असल्याने अनलॉक करण्यात आले आहे. त्यामुळे लोकांचे घराबाहेर पडणे सुरू झाले आहे. लसीकरणासाठी मोठ्या प्रमाणात गर्दी दिसत आहे. त्यामुळे नागरिकांना लसीकरणासाठी रांगेत उभे राहावे लागते. त्यामुळे प्रत्येक वॉर्डात लसीकरण केंद्र निर्माण करावे. तसेच शासनाने १८ ते ४५ या वयोगटातील नागरिकांचेही लसीकरण सुरू करावे, अशी मागणी नगरसेवक संतोष शिनगारे यांनी केली आहे.
-------------------------
बाजारातील गर्दीवर नियंत्रण आणावे
अंबाजोगाई : अंबाजोगाईत लॉकडाऊन बंद करून अनलॉक करण्यात आले आहे. त्यामुळे बाजारपेठेत गर्दी वाढली असल्याचे दिसून येत आहे. बहुतांश दुकानांत सोशल डिस्टन्स न पाळता जीवनावश्यक साहित्याची खरेदी केली जात आहे. त्यामुळे याला वेळीच आळा घालणे गरजेचे आहे. येथील मंडई व बाजारामध्येही मोठ्या संख्येने नागरिक गर्दी करीत आहेत. त्यामुळे पुन्हा कोरोना उद्भवू शकतो. यासाठी नागरिकांनी गर्दी टाळून सुरक्षितता बाळगावी, असे आवाहन तालुका आरोग्य अधिकारी डॉ. बालासाहेब लोमटे यांनी केले आहे.
------------------------
अल्पवयीनांच्या हाती वाहनांच्या चाव्या
अंबाजोगाई : मागील काही दिवसांपासून अनलॉक करण्यात आले आहे. त्यामुळे सर्वजण घराबाहेर पडत आहेत. अल्पवयीन मुले मोटारसायकलवर स्वार होऊन सुसाट वेगाने गाड्या चालवीत आहेत. त्यांच्याजवळ गाडी चालविण्याचा परवानाही नसतो. पोलीस प्रशासनाने अल्पवयीन वाहनचालकांवर नजर ठेवून त्यांना आवर घालावा, अशी मागणी केली जात आहे.
----------------------
झाडांच्या फांद्यांनी झाकोळले पथदिवे
अंबाजोगाई : अंबाजोगाई तालुक्यातील अनेक गावांमध्ये काही पथदिव्यांसमोर झाडांच्या फांद्या आल्या आहेत. त्यामुळे पथदिव्यांचा प्रकाश रस्त्यांवर पोहोचत नाही. काही पथदिवे वेलींनी झाकोळले आहेत. काही दिवसांपूर्वी महापालिकेने स्वच्छता मोहीम आरंभली. मात्र आजही अनेक रस्त्यावर फांद्या असून अपघाताची शक्यता नाकारता येत नाही.