केज : तालुक्यातील लाडेवडगाव येथे आईवडिलांसोबत गेलेल्या दोन भावंडांचा शेताशेजारी असलेल्या शेततळ्यात पडल्याने पाण्यात बुडून मृत्यू झाल्याची घटना मंगळवारी दुपारी १२ वाजण्याच्या दरम्यान घडली.
केज तालुक्यातील लाडे वडगाव येथील ग्रामपंचायत सदस्य माधव नामदेव लाड व त्यांची पत्नी शेतकाम करण्यासाठी सुतारशेत या शेतात गेले होते. शेतात माधव लाड हे म्हैस बांधायला जाताना त्यांच्या पाठीमागे त्यांची मुले हर्षद माधव लाड (वय ७) व ओम माधव लाड (५) चालत होती. मात्र म्हैस बांधायला माधव हे पुढे गेल्यावर त्यांची दोन्ही मुले त्यांच्या पाठीमागे न जाता शेजारी असलेल्या शेततळ्यावर गेली. तेथे पाय घसरल्याने दोन्ही भावंडे शेततळ्यात पडल्याने पाण्यात बुडून त्यांचा मृत्यू झाला.
दरम्यान, पाठीमागे चालत आलेली दोन्ही मुले आली नसल्याने माधव लाड यांनी शेतात काम करीत असलेल्या त्यांच्या पत्नीला मुले आली का अशी विचारणा केली असता त्यांनी दोन्ही मुले आपल्याकडे आली नसल्याचे सांगितले. त्यामुळे माधव लाड यांनी शेताशेजारच्या सुंदर बाप्पाजी लाड यांच्या शेतातील शेततळ्याकडे धाव घेतली असता पाण्यावर मुलाची चप्पल तरंगताना दिसून आली. त्यांनी शेततळ्यातील पाण्यात मुलाचा शोध घेतला असता दोन्ही मुलांचा मृतदेह आढळून आला. माधव लाड यांना दोन्ही मुले होती, तीदेखील शेततळ्यातील पाण्यात बुडून मरण पावल्याने त्यांना धक्का बसला असून लाडेगावमध्ये शोककळा पसरली आहे.
270721\1942-img-20210727-wa0024.jpg~270721\1942-img-20210727-wa0025.jpg
मयत हर्षद लाड~मयत ओम लाड