सोमनाथ खताळ
बीड : राज्य परिवहन महामंडळाच्या बसेसमधून प्रवास करताना पुन्हा आता खाट-खाट असा आवाज यायला सुरुवात झाली आहे. तिकीट देणाऱ्या तब्बल ५५० इलेक्ट्रॉनिक मशीन बिघडल्या आहेत. त्याच्या दुरूस्तीला महामंडळाकडे निधी नसल्याचे सांगण्यात येत आहे. त्यामुळे पुन्हा एकदा जुन्या पद्धतीच्या ११६ ट्रे मशीनचा वापर सुरू झाला आहे. परंतु, काही वाहकांना याचे प्रशिक्षणच दिलेले नसल्याने ते याला वैतागले आहेत.
जिल्ह्यात साधारण २००९ पासून इलेक्ट्रॉनिक मशीनद्वारे प्रवाशांना तिकीट देणे सुरू झाले. यासाठी रापमने खासगी कंपनीकडून या मशीन खरेदी केल्या. यासाठी लाखो रुपयांचा खर्च केला. त्यानंतर साधारण २०१५ मध्ये पुन्हा नव्याने मशीन खरेदी केल्या. यात वारंवार बिघाड होत गेले. याच्या दुरूस्तीवरही महामंडळाला खर्च करावा लागला. आता मागील दीड वर्षापासून कोरोनामुळे बसेस जागेवरच उभा आहेत. त्यातच जिल्ह्यातील १ हजार ९४ पैकी तब्बल ५५० मशीन बंद पडल्या आहेत. याची दुरूस्ती केली जात नसल्याने जुन्या खाट- खाट वाजणाऱ्या ट्रे मशीनचा वापर सुरू करण्यात आला आहे. यामुळे नवख्या वाहकांना यासाठी वेळ लागत असून, ते वैतागल्याचे सांगण्यात आले.
वाहकांना प्रशिक्षणाची गरज
जुन्या मशीनचे प्रशिक्षण साधारण आठ ते दहा वर्षांपूर्वी देण्यात आलेले आहे. तसे प्रमाणपत्रही त्यांच्याकडून घेण्यात आले. परंतु इलेक्ट्रॉनिक मशीनमुळे जुन्या ट्रे वापराचा विसर पडला आहे. त्यासाठी या कर्मचाऱ्यांना नव्याने आठवडाभराचे प्रशिक्षण द्यावे, अशी मागणी वाहकांसह संभाजी ब्रिगेडचे विभागीय अध्यक्ष राहुल वाईकर यांनी केली आहे. प्रशिक्षण नसल्याने चुकीचे तिकीट जाण्यासह कारवाईही अंगलट येण्याची भीती व्यक्त होत आहे.
---
इलेक्ट्रॉनिक मशीनमध्ये तिकिटामागे दर आकारणी केली जाते. ते परवडणारे नाही. तसेच मशीनमध्येही बिघाड आहे. महामंडळाकडे निधी नसल्याने जुन्या मशीन सुरू केल्या आहेत. याचे प्रशिक्षण आगोदरच वाहकांना दिलेले आहे.
अजय मोरे, विभाग नियंत्रक, बीड
---
आगारनिहाय आकडेवारी
आगारइलेक्ट्रॉनिक मशीनबिघाड ट्रेचा वापर
बीड १९७ १२५ २०
परळी १८४ ७६ १९
धारूर १०६ ४० २२
माजलगाव ११७ ६८ १८
गेवराई १०९ ५६ १२
पाटोदा ९७ ४० ९
आष्टी ११९ ६१ ००
अंबाजोगाई १६४ ८४ १८
एकूण १०९३ ५५० ११६