गतिमंद युवतीवर वर्षभरापासून अत्याचार

पीडिता गर्भवती राहिल्याने प्रकरण उघडकीस;

अत्याचारी तरुण अटकेत

अंबाजोगाई : परळी तालुक्यातील २१ वर्षीय गतिमंद युवतीवर एका तरुणाने वर्षभरापासून सातत्याने अत्याचार केला. त्यातून पीडिता गर्भवती राहिल्याने या प्रकरणाचे बिंग फुटले. याप्रकरणी अंबाजोगाई ग्रामीण पोलीस ठाण्यात गुन्हा नोंद झाला आला आहे.

गोविंद मुंजाजी रूद्रे (वय २१, रा. वडगाव, ता.जि. औरंगाबाद) असे त्या आरोपी तरुणाचे नाव आहे. पीडितेच्या आईने दिलेल्या फिर्यादीनुसार त्यांची २१ वर्षीय मुलगी गतिमंद आहे. गोविंद हा नेहमी त्यांच्या घरी येत असे. मागील वर्षापासून लॉकडाऊनमुळे त्याचे इकडे राहणे वाढले होते. पीडिता गतिमंद असल्याचा गैरफायदा घेत मागील वर्षभरापासून गोविंदने घरात कोणी नसतानाची संधी साधून तिच्यावर वारंवार अत्याचार केला. त्यातून पीडिता गर्भवती राहिली आणि तिच्यावरील अत्याचाराला वाचा फुटली. या फिर्यादीवरून गोविंद रुद्रे याच्यावर अंबाजोगाई ग्रामीण ठाण्यात बलात्काराचा गुन्हा नोंदविण्यात आला. पुढील तपास फौजदार मोनाली पवार या करत आहेत.

औरंगाबादेत ठोकल्या बेड्या

गुन्हा दाखल होताच अंबाजोगाई ग्रामीण पोलिसांचे एक पथक फरार आरोपीच्या शोधासाठी रवाना झाले. गोविंद औरंगाबादला असल्याची खबर मिळाल्यानंतर या पथकाने औरंगाबाद गाठून त्यास अवघ्या २४ तासांत बेड्या ठोकल्या आणि अंबाजोगाईला आणले. त्याला मंगळवारी न्यायालयासमोर हजर करण्यात येणार आहे.