लोकमत न्यूज नेटवर्क
केज : ओला व सुका कचरा टाकण्यास कचराकुंड्या नगरपंचायतीने बसवल्या नाहीत. त्यामुळे घरातील कचरा रस्त्यावर टाकला जातो. याबाबत ‘लोकमत’ने वृत्त प्रकाशित करताच केज नगरपंचायतीचे प्रशासक तथा उपजिल्हाधिकारी शरद झाडके यांनी स्वच्छता कर्मचाऱ्यांची बैठक घेतली. शहरातील रस्त्यावर घाण अथवा कचरा दिसून आल्यास कारवाई करण्याचा इशारा दिला आहे. केज नगर पंचायतीने ओला व सुका कचरा टाकण्यासाठी कचराकुंड्या शहरात बसवल्या नसल्याने घरातील व दुकानातील ओला व सुका कचरा टाकण्यास शहरातील लोकांनी रस्त्याची निवड केली आहे. मंगळवार पेठेसह शहरातील रस्त्यावर ठिकठिकाणी रात्रीच्या वेळी कचरा टाकण्यास सुरवात केली. याबाबत ‘लोकमत’ने ‘केजचे मंगळवार पेठ बनले कचरा डेपो’ हे वृत्त २७ जून रोजी प्रसिध्द केले होते. या वृत्ताची दखल केज नगर पंचायतीचे प्रशासक शरद झाडके यांनी गुरुवारी(१ जुलै) रोजी केज नगर पंचायतीत नगर पंचायतीच्या स्वच्छता कर्मचाऱ्यांसह केज शहरातील कचरा उचलण्याचे टेंडर घेतलेल्या गुत्तेदाराची बैठक घेतली. शहरातील रस्ते कचरामुक्त करण्यासह शहरातील नाल्याची साफसफाई करणे आदीबाबत सूचना त्यांनी केल्या. शहरातील नाल्या व रस्त्यावर कचरा अथवा घाण दिसून आल्यावर कर्मचाऱ्यांवर कारवाई करण्याचा इशाराही त्यांनी दिला आहे. शहरातील सर्व प्रभागात स्वच्छता करावी, असेही त्यांनी बैठकीत कर्मचाऱ्यांना सांगितले. घनदाट वृक्ष लागवडीबाबतही त्यांनी नगरपंचायतीच्या कर्मचाऱ्यांना मार्गदर्शन केले.
... अचानक भेट देऊन करणार पाहणी
नगर पंचायतीमध्ये कर्मचाऱ्यांची बैठक घेऊन त्यांना शहरातील रस्ते कचरामुक्त करण्यासह नाल्याची साफसफाई करण्याच्या सूचना दिल्या आहेत. मी अचानक केव्हाही भेट देऊन पाहणी करणार आहे. रस्त्यावर घाण आढळून आल्यास कर्मचाऱ्यांवर कारवाई केली जाईल, असेही शरद झाडके यांनी सांगितले.
.... कंत्राटदारास बजावली नोटीस
केज शहरातील नाल्यांतील घाण काढणे, कचरा उचलणे यासाठीचे कंत्राट घेतलेल्या गुत्तेदाराने ७४ कामगार कामावर ठेवणे आवश्यक असताना त्याच्याकडे ५४ कामगार असल्याने आढळून आले आहेत. याबाबत त्यास नोटीस बजावण्यात आली आहे. नगर पंचायतीच्या २४ कायम स्वच्छता कामगारांकडे शहरातील रस्ते सफाईचे काम आहे. -शरद झाडके, केज नगरपंचायत, प्रशासक.