बीड : अल्पवयीन मुलीचा विनयंभग केल्याप्रकरणी आरोपी प्रकाश मारुती सानप (रा. पिंपळ्याची वाडी, ता. शिरूर) यास तीन वर्षे सश्रम कारावासाची शिक्षा प्रमुख जिल्हा व सत्र न्या. एच.एस. महाजन यांच्या न्यायालयाने सुनावली.
१९ डिसेंबर २०१८ रोजी सायंकाळी शिरूर तालुक्यातील पिंपळ्याची वाडी शिवारातील एका शेतात पीडित अल्पवयीन मुलगी विहिरीवर पाणी शेंदत असताना तिला पाठीमागून मिठी मारून तिचा विनयभंग केला. या घटनेच्या अनुषंगाने पीडित मुलीच्या फिर्यादीवरून शिरूर पोलीस ठाण्यात विनयभंग, तसेच कलम ८ बालकांचे लैंगिक अत्याचारापासून संरक्षण अधिनियमानुसार गुन्हा नोंद करण्यात आला होता. या प्रकरणाचा तपास तत्कालीन पोलीस उपनिरीक्षक एम.आर. काझी यांनी करून आरोपीविरुद्ध दिसून येत असलेल्या सबळ पुराव्याच्या आधारावर न्यायालयात अंतिम दोषारोपपत्र सादर केले होते.
या प्रकरणाची सुनावणी प्रमुख जिल्हा व सत्र न्या. एच.एस. महाजन यांच्या न्यायालयात झाली. सुनावणीअंती दिसून येत असलल्या सबळ पुराव्याच्या आधारावर न्यायालयाने आरोपीला कलम ८ बालकांचे लैंगिक अत्याचारापासून संरक्षण अधिनियम २०१२ अंतर्गत दोषी धरून तीन वर्षे सश्रम कारावास व एक हजार रुपये दंड, दंड न भरल्यास एक महिना अतिरिक्त साधा कारावास, अशी शिक्षा सुनावली. या प्रकरणात सरकारी पक्षाची बाजू सहायक सरकारी वकील एस.व्ही. सुलाखे यांनी मांडली. त्यांना ॲड. हरिहर गर्जे यांनी सहकार्य केले, तर पैरवीचे कामकाज सहायक फौजदार सी.एस. इंगळे यांनी पाहिले.
----------