आता क्रीडा शिक्षकांनाही राज्य पुरस्कार

प्राथमिक, माध्यमिक व उच्च माध्यमिक शिक्षकांप्रमाणेच आता राज्यातील क्रीडा शिक्षकांना राज्य शासनामार्फत पुरस्कार दिला जाणार आहे.

अमरावती : प्राथमिक, माध्यमिक व उच्च माध्यमिक शिक्षकांप्रमाणेच आता राज्यातील क्रीडा शिक्षकांना राज्य शासनामार्फत पुरस्कार दिला जाणार आहे. यामध्ये दोन प्रकारचे पुरस्कार राहतील. राज्यस्तरावर रोख ५0 हजार तर जिल्हा स्तरावर १0 हजार रुपये असे पुरस्काराचे स्वरुप आहे. जिल्हा व राज्यस्तरावर एकूण ८६ पुरस्कार शिक्षकांना मिळणार आहेत.
क्रीडा शिक्षकांना देण्यात येणार्‍या या पुरस्कारासाठी १ जानेवारी ते ३१ डिसेंबर या कालावधीत मागील ३ वर्षांतील कामगिरी लक्षात घेतली जाईल. राज्यस्तरावर प्रत्येक विभागासाठी एक पुरुष आणि एक महिला याप्रमाणे आठ विभागांसाठी १६ पुरस्कार दिले जाणार आहेत. जिल्हा पातळीवर प्रत्येक जिल्हय़ात एक महिला, एक पुरुष याप्रमाणे ७0 पुरस्कार दिले जाईल. महापालिका असलेल्या जिल्ह्यांनाही महसूल जिल्हा क्षेत्रासाठी एक पुरस्कार दिला जाणार आहे. या पुरस्कारासाठी अर्ज करणार्‍या शिक्षकांने घडविलेले खेळाडू तसेच क्रीडाविषयक विकासात्मक कार्य हे संबंधित जिल्हय़ात असावे. एखाद्या व्यक्तीने चुकीची माहिती देऊन पुरस्कार मिळवल्याचे आढळल्यास पुरस्कार रद्द करण्याचा अधिकार शासनाला आहे. हा पुरस्कार दोन किंवा अधिक व्यक्तींना विभागाकडून दिला जाणार नाही. पुरस्कारासाठी अपात्र शिक्षक आढळून आल्यास पुरस्कार रद्द केला जाईल. ७0 टक्के गुणांकन मिळविणार्‍यां हा पुरस्कार दिला जाईल. यात क्रीडा मार्गदर्शनातून घडवलेले खेळाडू विकासात्मक कार्य, क्रीडा प्रचार, तांत्रिक अधिकारी म्हणून केलेले कार्य गुणांकनासाठी पात्र राहतील. राज्यस्तरीय पुरस्कारासाठी नेमण्यात आलेल्या समितीचे अध्यक्ष हे क्रीडामंत्री तर जिल्हा पुरस्कार समितीचे अध्यक्ष जिल्हाधिकारी राहणार आहेत. (प्रतिनिधी)