बडनेर्‍यातील ट्रॉमा केअरचे लोकार्पण रखडले

बडनेरा : बडनेर्‍यातील ट्रामा केअर युनिटच्या इमारतीचे बांधकाम पूर्ण होऊन तब्बल दीड वर्ष पूर्ण झाले. मात्र अद्यापपर्यंत हा दवाखाना प्रशासनाने सुरू केलेला नाही. निवडणूक आचारसंहितेमुळे पुढे सहा महिन्यापर्यंत या दवाखान्याचा मुहूर्त निघणार नसल्याचे चिन्ह आहे. इमारतीच्या देखभालीमागे लाखो रुपये खर्च होत आहे. १६ आॅक्टोबर २०११ रोजी बडनेर्‍यात ट्रामा केअर युनिट या दवाखान्याची इमारत उभारणीचे काम आरोग्य मंत्री सुरेश शेट्टी, आमदार रवी राणा, तत्कालीन मनपा आयुक्त नवीन सोना, शल्य चिकीत्सक डॉ. सी. एल. सोनकुसरे यांच्या प्रमुख उपस्थितीत भूमिपूजनाने सुरु करण्यात आले. त्यानंतर या इमारतीचे काम अवघ्या १५ महिन्यात पूर्ण करण्यात आले. ज्या घाईने हा दवाखाना उभारण्यात आला तेवढ्या घाईने मात्र या ट्रामा केअर युनिटला लोकांच्या सेवेत रुजू करण्यात आले नाही. परिणामी या इमारतीच्या देखभालीमागे वायफळ खर्च करण्यात येत आहे. आतापर्यंत लाखाच्यावर विजबिल या इमारतीसाठी भरण्यात आले आहे. सार्वजनिक बांधकाम विभागाने बडनेर्‍यातील ट्रामा केअर युनिट या दवाखान्याचे बांधकाम उभारुन दिले आहे. फेब्रुवारी २०१३ मध्ये रंगरंगोटीसह या दवाखान्याचे काम पूर्ण करण्यात आले. सार्वजनिक बांधकाम विभागाने दीड वर्षापूर्वीचे जिल्हा शल्य चिकीत्सकांना इमारत ताब्यात घेण्याचे पत्र दिले होते. दीड करोड खर्च करुन शासनाने बडनेर्‍यात ट्रामा केअर युनिट उभारले आहे. बडनेरा शहराला जवळजवळ १०० खेडी जुळून आहेत. लगतच्या महामार्गावर अपघातांचे प्रमाण मोठ्या प्रमाणात आहे. दरदिवसाला या भागातून गंभीर अवस्थेतील रुग्णांना उपचारासाठी जिल्हा सामान्य रुग्णालयात न्यावे लागत आहे. अमरावतीच्या दवाखान्यांमध्ये नेत असताना कित्येकांनी रस्त्यातच दम सोडला आहे. बडनेर्‍यात ट्रामा केअर युनिट हा दवाखाना लवकरात लवकर सुरू होणे गरजेचे आहे. दीड वर्षापासून उभारलेले ट्रामा केअर शोभेची वास्तु ठरत आहे. आचारसंहिता लागण्यापूर्वी हा दवाखाना सुरू करता आला असता. पुढे विधानपरिषद, विधानसभा या दोनही निवडणुकांच्या आचारसंहिता सलग येणार आहे. सहा महिन्यापर्यंत बडनेर्‍यातील ट्रामा केअर युनिट हा दवाखाना सुरू होण्याचे कुठलेही संकेत नाही. (शहर प्रतिनिधी)