राम मेघे अभियांत्रिकीतील ८५ कर्मचाऱ्यांना डच्चू

येथील विदर्भ युथ वेलफेअर सोसायटीद्वारा संचालित बडनेरा स्थित प्रा. राम मेघे अभियांत्रिकी आणि तांत्रिक संस्थेमधील ८५ कर्मचाऱ्यांच्या ....

अमरावती : येथील विदर्भ युथ वेलफेअर सोसायटीद्वारा संचालित बडनेरा स्थित प्रा. राम मेघे अभियांत्रिकी आणि तांत्रिक संस्थेमधील ८५ कर्मचार्‍यांच्या नियुक्त्या नियमबाह्य असल्याचा ठपका ठेवून नव्या कार्यकारिणीने हा निर्णय घेतला आहे. एकाचवेळी मोठ्या संख्येने कर्मचार्‍यांना डच्चू देण्याचा घेतलेला निर्णय म्हणजे संदीप मेघे यांना मोठा धक्का असल्याचे शिक्षण क्षेत्रात बोलले जात आहे. राज्याचे माजी शिक्षणमंत्री प्रा. राम मेघे यांनी स्थापन केलेल्या विदर्भ युथ वेलफेअर सोसायटीद्वारा निर्माण झालेल्या शिक्षण संस्थाचे जाळे विदर्भात शिवाजी शिक्षण संस्थेनंतर दुसर्‍या क्रमांकाचे आहे. अभियांत्रिकी महाविद्यालय, दंत महाविद्यालय, तांत्रिकी महाविद्यालयासह कला, विज्ञान, वाणिज्य महाविद्यालयाच्या अनेक शाखा आहेत. मात्र कालांतराने कार्यकारिणीत सदस्यांमध्ये प्रचंड वाद निर्माण झाले. पदाधिकारी नियुक्ती असो की महाविद्यालयात कर्मचार्‍यांच्या नियुक्त्याचा वाद न्यायालयात पोहचला. संस्थेचे तत्कालीन अध्यक्ष संदीप मेघे यांच्या विरुध्द कार्यकारिणीतील सदस्यांनी जिल्हा न्यायालय, उच्च न्यायालय, सर्वोच्च न्यायालयात धाव घेतली. अखेर सर्वोच्च न्यायालयाने संदीप मेघे यांनी कार्यकारिणीत सदस्य म्हणून नियुक्त केलेल्या व्यक्तींची नियुक्ती रद्द करुन जुन्याच सदस्य संख्येच्या आधारे नव्याने कार्यकारिणीची निवडणूक घेण्याचे आदेश दिले. त्यानुसार मार्च २०१४ मध्ये कार्यकारिणीच्या पदाधिकार्‍यांची निवडणूक प्रक्रिया पार पडली. अखेर संदीप मेघे आणि त्यांच्या समर्थकांना कार्यकारिणीतून बाहेर व्हावे लागले. मात्र संस्थेचे प्रकरण न्यायालयात सुरु असताना या दरम्यान संदीप मेघे यांनी केलेल्या कर्मचार्‍यांच्या नियुक्त्यांवर कुºहाड कोसळली आहे. १३ डिसेंबर २०११ पर्यंत संदीप मेघे यांच्या कार्यकारिणीने कर्मचार्‍यांच्या नियुक्त्या किंवा आर्थिक व्यवहाराविषयीचे निर्णय घेऊ नये, असे न्यायालयाचे बंधन होते. तरीदेखील मेघे यांनी अध्यक्षपदावर असताना राम मेघे अभियांत्रिकी आणि तांत्रिक संस्थेत चक्क ८५ कर्मचार्‍यांच्या नियमबाह्य नियुक्त्या केल्या. आर्थिक व्यवहारही झाल्याचा विद्यमान कार्यकारिणीचा आरोप आहे. नातेवाईकांचा गोतावळा सांभाळण्यातच संदीप मेघे मग्न राहिलेत, न्यायालयाचे बंधन त्यांनी पाळले नाहीत. त्यामुळे अपेक्षेपेक्षा जास्त जागांचा भरणा करुन संस्थेवर आर्थिक भुर्दंड त्यांच्यामुळेच वाढला ही वस्तुस्थिती निर्माण झाली असल्याचाही आरोप होत आहे. (प्रतिनिधी)