‘पे अ‍ॅन्ड पार्क’चा प्रस्ताव फेटाळला

शहरातील दोन उड्डाणपुलाखाली वाहने उभी करण्यासाठी ‘पे अ‍ॅन्ड पार्क’चा प्रशासनाने वेळेवर आणलेला प्रस्ताव सदस्यांनी एकजूट होत फेटाळून लावला. एवढेच नव्हे, तर वाहनतळाच्या राखीव

महापालिका सदस्य आक्रमक : वाहनतळाचे अतिक्रमण हटविण्याची मागणी
अमरावती : शहरातील दोन उड्डाणपुलाखाली वाहने उभी करण्यासाठी ‘पे अ‍ॅन्ड पार्क’चा प्रशासनाने वेळेवर आणलेला प्रस्ताव सदस्यांनी एकजूट होत फेटाळून लावला. एवढेच नव्हे, तर वाहनतळाच्या राखीव जागेवर असलेले अतिक्रमण का हटविले जात नाही, असा सवाल उपस्थित करुन ‘भ्रष्टाचारी’ अशी उपमा देत महापालिका प्रशासनाची लक्तरे वेशीवर टांगली.
डॉ.बाबासाहेब आंबेडकर सभागृहात महापौर चरणजित कौर नंदा यांच्या पीठासीनाखाली शनिवारी सर्वसाधारण सभा पार पडली. यावेळी पीठासीनावर उपायुक्त विनायक औगड, नगरसचिव मदन तांबेकर यांनी कामकाज सांभाळले. सभेच्या प्रारंभी शहर बस समिती सदस्य नियुक्तीवरुन वादळ उठले. राष्ट्रवादीचे सुनील काळे आणि अविनाश मार्डीकर यांच्यात सदस्य निवडीच्या पत्रावरुन शाब्दिक वादही झाला. अखेर महापौरांनी राष्ट्रवादी काँग्रेस, बसपा, शिवसेना या गटात नेतेदाचा वाद कायम असल्याने हा विषय पुढच्या सर्वसाधारण सभेत ठेवण्याचा निर्णय घेतला.
अवैध होर्डींग्जचा मुद्दा गाजला
प्रदीप दंदे यांनी वैराग्यमूर्ती संत गाडगेबाबा यांची पुण्यतिथी असल्याचे सांगून सर्वसाधारण सभा स्थगित करण्याचा मुद्दा उपस्थित केला. मात्र काही सदस्यांच्या मागणीवरुन संत गाडगेबाबा यांच्या छायाचित्रांचे पूजन करुन आदरांजली वाहण्यात आली. बाजार परवाना विभागाचे प्रमुख गंगाप्रसाद जयस्वाल यांनी प्रशासनाच्यावतीने उड्डाणपुलाखाली ‘पे अ‍ॅन्ड पार्क’चा विषय वेळेवर सभागृहात आणला. याला सदस्यांनी कडाडून विरोध केला. दिनेश बूब यांनी याचा विरोध करीत प्रशासनाच्या कार्यप्रणालीवरच ताशेरे ओढले.
राजू मसराम, सुजाता झाडे यांनी अवैध होर्डिग्ज उभारण्याबाबतचा मुद्दा मांडला. प्रदीप बाजड, अरुण जयस्वाल, प्रदीप हिवसे, अमोेल ठाकरे, अजय सामदेकर, प्रशांत वानखडे, हमीद शद्दा हे प्रशासनावर तुटून पडले. अमोल ठाकरे यांनी शाम टॉकीज जवळील वाहनतळाच्या जागेवर असलेले अतिक्रमणाबाबत न्यायालयाच्या आदेशाचा दाखला देत अधिकाऱ्यांचा अक्षरश: वर्ग घेतला. वाहनतळासाठी राखीव असलेले अतिक्रमण काढण्यासाठी काय अडचण आहे? हा मुद्दा प्रदीप बाजड, प्रदीप हिवसे यांनी रेटून धरला. बाजड यांनी जुने दाखले देत या जागेप्रकरणी झालेल्या ‘तोडी’चा विषय उपस्थित केला. मात्र आता तोडातोडीचा विषय आला. महापौर चरणजित कौर नंदा यांना सावित्रीबाई फुले, अहल्यादेवी होळकर, झाशीची राणी अशा उपमा देत आम्ही तुम्हाला मर्दानी म्हणून बघतो, असे म्हणत प्रदीप बाजड यांनी काही तरी निर्णय द्या, असे म्हणाले. मात्र ही जागा शासनाची आहे, असा न्यायालयाचा निर्णय २३ सप्टेंबर २०१४ चा आहे. मात्र अतिक्रमण धारकांना कोर्टातून स्थनगादेश आणण्याची संधी प्रशासनाने दिली, असा आरोप अरुण जयस्वाल यांनी केला. (प्रतिनिधी)