अनेक इच्छुक बाशिंग बांधून तयार : गुलाबी थंडीत राजकीय वातावरण तापले
धारणी : जिल्ह्यातील भातकुली, तिवसा, नांदगाव खंडेश्वर व धारणी या चार नगरपंचायतींसाठी मार्च महिन्यात सार्वत्रिक निवडणूक होण्याचे संकेत आहेत. मतदारयादीचा कार्यक्रम जाहीर झाल्याने ८ मार्चनंतर केव्हाही निवडणूक कार्यक्रमाची घोषणा होऊ शकते. त्यादृष्टीने मेळघाटातील गुलाबी थंडीत राजकीय वातावरण तापायला सुरुवात झाली आहे.
२९ नोव्हेंबर २०२० रोजी चारही नगरपंचायतींचा कार्यकाळ संपुष्टात आला. तेथे प्रशासकाची नियुक्ती करण्यात आली. त्यावेळीपासून निवडणुकीची प्रतीक्षा शिगेला पोहोचली आहे. दरम्यान प्रभागातील संरचना आणि प्रभागनिहाय आरक्षण जाहीर करण्यात आले आहे. आता २ फेब्रुवारी रोजी मतदार यादी प्रकाशित करण्याबाबत सूचना प्राप्त झाल्यानंतर साधारणत: मार्चमध्ये नगरपंचायत निवडणूक होण्याची शक्यता बळावली आहे. त्यामुळे अनेक इच्छुकांचे चेहरे फुलले असून त्यांनी पुन्हा नव्या जोमाने तयारीला सुरुवात केली आहे. १५ फेब्रुवारी रोजी प्रारूप मतदार यादी प्रसिध्द केली जाणार आहे, तर, ८ मार्च रोजी चारही नगरपंचायतीमधील मतदान केंद्रनिहाय यादी प्रसिध्द केली जाणार आहे. आठवडाभरापासून मेळघाटात थंडीने जोर धरला असला तरी नगरपंचायत निवडणूक असल्यामुळे शहरातील वातावरण तापले आहे.
१७ प्रभागात चुरस
धारणी शहरात एकूण १७ प्रभाग असून, त्यापैकी ९ जागा महिलांसाठी आरक्षित आहेत. अनेक मावळत्या नगरसेवकांनी निवडणुकीची तयारी चालविली असून, तरुण वर्गदेखील सरसावला आहे. त्यामुळे प्रस्थापित विरुद्ध तरुण यांच्या दरम्यान खरी लढत होण्याचे चिन्ह दिसत आहेत. घोषणेपूर्वी सर्व राजकीय पक्षांनी संभाव्य उमेदवारांची चाचपणी करण्यास सुरुवात केली आहे. यामध्ये काँग्रेस, राष्ट्रवादी काँग्रेस, भारतीय जनता पक्ष, शिवसेना, युवा स्वाभिमान पक्ष, प्रहार आणि बहुजन समाज पक्षामार्फत चाचपणी केली जात आहे.
------------