सुनील देशपांडे - अचलपूर
अचलपूर-परतवाड्यासह तालुक्यात अनेक ठिकाणी इंग्रजी माध्यमाच्या खासगी शाळांचे पेव फुटले आहे. या शाळांमध्ये कार्यरत अनेक डी.एड., बी.एड. पात्रताधारक शिक्षक अत्यल्प मानधनावर कार्यरत आहेत. जुळ्या शहरात ३० पेक्षा अधिक इंग्रजी माध्यमांच्या शाळा असून त्यातील काहींना शिक्षण विभागाची मान्यतासुद्धा नाही. बेरोजगारीचे प्रमाण प्रचंड वाढल्यामुळे अशा खासगी शाळांमध्ये अनेक तरूण-तरूणी अत्यल्प वेतनावर नोकर्या करतात. शिवाय या शाळांवर शिक्षण विभागाचा कोणताच अंकुश नसल्याने संस्थाचालक पालकांकडून भरमसाठ शुल्क आकारत आहेत. असे असूनही या शाळांमध्ये कार्यरत कर्मचार्यांना पुरेसे मानधन आणि इतर सुविधा उपलब्ध करून दिली जात नाही. नियमबाह्य कामे करण्यास त्यांना बाध्य केले जाते. पालकांकडून भरमसाठ शुल्क आकारल्यानंतरही या शाळांमध्ये शिकणार्या विद्यार्थ्यांना पुरेशा सोई उपलब्ध करून दिल्या जात नाहीत. त्यांच्यासाठी पाण्याची सोय देखील केली जात नाही. त्यामुळे पालकवर्ग सतत दबक्या आवाजात तक्रारी करीत असतात. (प्रतिनिधी) पाल्यांना इंग्रजी माध्यमात शिकविण्याच्या पालकांच्या अट्टाहासापायी या खासगी इंग्रजी शाळांमध्ये विद्यार्थी संख्या वाढत असली तरी तक्रारीही वाढत आहेत. अनेक शाळांंमध्ये तर विनापरवानगी अतिरिक्त तुकड्या सुरू करण्यात आल्या आहेत. या शाळांकडे शिक्षण विभागाचे दुर्लक्ष होत असल्याने त्यांच्यावर कोणाचाच अंकुश राहिलेला नाही. या खासगी इंग्रजी माध्यमांच्या शाळांमधील अव्यवस्था दूर करण्याची मागणी केली जात आहे.