अमरावतीमध्ये अल्पवयीन मुलींचे साडेतीनशे व्हिडीओ काढल्याचा दावा, तरुण गजाआड, व्हिडीओ-चित्र सोशल मीडियावर व्हायरल

Amravati Crime News: अल्पवयीन मुलींचे अश्लील व्हिडिओ सोशल मीडियावर व्हायरल करणाऱ्या परतवाड्यातील तरुणाला अखेर सोमवारी रात्री  पोलिसांनी अटक केली. अयान अहमद तनवीर अहमद (वय १९, रा. परतवाडा) असे आरोपीचे नाव आहे.

परतवाडा (अमरावती) - अल्पवयीन मुलींचे अश्लील व्हिडिओ सोशल मीडियावर व्हायरल करणाऱ्या परतवाड्यातील तरुणाला अखेर सोमवारी रात्री  पोलिसांनी अटक केली. अयान अहमद तनवीर अहमद (वय १९, रा. परतवाडा) असे आरोपीचे नाव आहे. न्यायालयाने त्याला दोन दिवसांची पोलिस कोठडी सुनावली आहे.  मुख्यमंत्र्यांकडून दखल
याप्रकरणी मुख्यमंत्री देवेंद्र फडणवीस यांनी पुढाकार घेऊन अमरावती जिल्हा पोलिस अधीक्षकांना कुठलीही हयगय न करता कडक कारवाई करण्याचे निर्देश दिले होते.

पालकमंत्र्यांकडून कठोर कारवाईचे निर्देश 
अमरावती जिल्ह्याचे पालकमंत्री चंद्रशेखर बावनकुळे यांनीदेखील या प्रकरणाची दखल घेत अमरावतीच्या पोलीस अधीक्षकांशी तात्काळ संपर्क साधला. याप्रकरणी कठोर कारवाई करण्याचे निर्देश पालकमंत्र्यांनी दिले आहेत. त्यामुळे या प्रकरणाच्या तपासाला गती मिळू शकते.

मुलींशी अश्लील वर्तन
गेल्या दोन-तीन दिवसांपासून सुमारे सहा ते आठ व्हिडिओ वेगाने व्हायरल झाले होते. त्यात आरोपी तरुण वेगवेगळ्या मुलींशी अश्लील वर्तन करताना दिसून आला होता. घटनेचे गांभीर्य ओळखून खा.डॉ. अनिल बोंडे, आ. प्रवीण तायडे यांनी सोमवारी दुपारी भाजप शिष्टमंडळासह पोलिस अधीक्षक विशाल आनंद यांची भेट घेतली.
यानंतर रात्री उशिरा पोलिसांनी 
अयान याला अटक केली. यादरम्यान, आ. प्रवीण तायडे यांनी अयानने सुमारे दीडशे मुलींशी जवळीक साधून तब्बल साडेतीनशे व्हिडिओ तयार केल्याचा आरोप करीत त्याची सत्यता तपासण्याची मागणी पोलिसांकडे केली. परतवाड्याचे ठाणेदार सुरेश म्हस्के यांच्या मार्गदर्शनात पुढील तपास 
होत आहे.