मोहन राऊत
धामणगाव रेल्वे : कोरोनाच्या महामारी संकटांनंतर काही जिल्ह्यातील स्थिती पूर्वपदावर येत असल्याने सहकार विभागाने मागील दोन वर्षांपासून लांबलेल्या सहकारातील निवडणुका टप्प्याटप्प्याने घेण्याचे नियोजन केले असून, तालुक्यातील खरेदी-विक्री संस्थांसह १९ सेवा सहकारी संस्थांची निवडणूक सहा टप्प्यांत घेण्यात येणार आहेत.
धामणगाव तालुक्यात ४३ सेवा सहकारी संस्था कार्यरत होत्या. मात्र, कर्ज वाटप व वसुली कमी असल्याने १२ संस्था अवसायनात काढत येथील सभासद नजीकच्या सेवा संस्थेला जोडण्यात आले. सध्या ३१ सेवा सहकारी संस्था कार्यरत असून, यातील १९ संस्थांच्या निवडणुका सहा टप्प्यांत घेण्यात येणार आहे. चालू वर्षांच्या कर्जदार सभासदांपैकी केवळ एकच उमेदवारांनी अर्ज सादर केलेल्या गतवर्षीच्या खर्डा सेवा सहकारी संस्थेची स्थगित झालेली व सध्या प्रशासक असलेल्या या खर्डा संस्थेची निवडणूक दुस०या टप्प्यात घेण्यात येणार आहे. तिस०या टप्प्यात दिघी महल्ले, पिंपळखुटा, गव्हा फरकाडे, विरुळ रोघे, वडगाव राजदी, अशोकनगर, अंजनसिंगी येथील सेवा सहकारी संस्थांची निवडणूक होणार आहे. चौथ्या टप्प्यात सोनोरा काकडे, सोनेगाव, देवगाव, विटाळा, तुळजापूर, शेंदूरजना खुर्द, दाभाडा, वाघोली, कासारखेड, तळेगाव दशासर या संस्थेच्या निवडणुकीचा बिगूल वाजणार आहे. पाचव्या टप्प्यात मंगरूळ दस्तगिर, जळगाव आर्वी, दत्तापूर धामणगाव खरेदी विक्री संस्था तसेच सहाव्या टप्प्यात कल्पतरू कर्मचारी पतसंस्थेची निवडणूक होणार आहे. मतदार यादी अद्ययावत करण्याच्या प्रक्रियेला सुरुवात होणार आहे.
दृष्टिक्षेपात धामणगाव तालुका
दुसरा टप्पा - १
तिसरा टप्पा - ७
चौथा टप्पा - १०
पाचवा टप्पा - ३
सहावा टप्पा - १ (कर्मचारी पतसंस्था)
कोट
धामणगाव तालुक्यातील सहा टप्प्यांत निवडणुका घेण्याचे नियोजन तालुकास्तरावरुन करण्यात येणार आहे. सहकार विभागाच्या पुढील आदेशानुसार मतदार यादी अपडेट करण्यात येईल.
- संदीप जाधव, जिल्हा उपनिबंधक, सहकारी संस्था, अमरावती
कोट
तालुक्यातील ३१ कार्यरत सेवा सहकारी संस्थांपैकी १९ संस्था निवडणुकीस पात्र आहेत. जिल्हास्तरावरून आदेश प्राप्त होताच मतदार यादी तयार करण्यात येईल.
- सुनील भगत, तालुका व्यवस्थापक, देखरेख सहकारी संस्था, धामणगाव रेल्वे