पाच दिवसांचा अल्टिमेटम
अमरावती : शहर पोलीस आयुक्तालयातील गुन्हे अन्वेषण शाखा व दोन पोलीस ठाण्यातील डिटेक्शन पथकात कार्यरत ३८ कर्मचार्यांच्या कामगिरीबद्दल असमाधान व्यक्त करीत या कर्मचार्यांना पोलीस उपायुक्तांनी कारणे दाखवा नोटीस बजावल्या आहेत. कर्मचार्यांना त्यांची बाजू मांडण्यासाठी पाच दिवसांचा अल्टिमेटम देण्यात आला आहे. शहर पोलीस आयुक्तालयाच्या हद्दीत गेल्या काही दिवसांपासून चोर्या, जबरी चोर्या, घरफोड्या तसेच दरोड्याच्या घटना वाढल्या आहेत. शहर पोलीस आयुक्तालयातील प्रत्येक पोलीस ठाण्यात डिटेक्शन पथक बनविण्यात आले आहे. या पथकातील कर्मचारी व गुन्हे शाखेचे कर्मचारी शहरात गस्त करीत असतानाही या घटना वाढत असल्याने काही कर्मचार्यांच्या कामगिरीवर प्रश्नचिन्ह उपस्थित करण्यात आले. गुन्हे शाखेत एकूण ४९ कर्मचारी कार्यरत आहेत. यापैकी २१ आणि राजापेठ व शहर कोतवाली पोलीस ठाण्यातील डिटेक्शन पथकात कार्यरत १७ कर्मचार्यांच्या कामगिरीवर प्रश्नचिन्ह लावण्यात आले. या कर्मचार्यांना गुरुवारी पोलीस उपायुक्तांनी कारणे दाखवा नोटीस बजावली. कर्मचार्यांना त्यांची बाजू मांडण्यासाठी पाच दिवसांचा वेळ दिला आहे. कर्मचार्यांकडून समाधानकारक उत्तर न मिळाल्यास वेतनवाढ १ वर्षासाठी रोखण्याची माहिती पोलीस सूत्रांनी दिली.