माजी नगरसेवकासह तिघांना शहरात प्रवेश बंदी

शेख अक्रम नौरंगाबादी हत्याकांड, नागपूर खंडपीठाचा आदेश

अकोला - गवळीपुरा परिसरात २0१४ मध्ये झालेल्या शेख अक्रम नौरंगाबादी हत्याकांड प्रकरणातील आरोपी तथा माजी नगरसेवक शेख फरीद पहेलवान, शेख सुलतान व शेख रशीद या तिघांना अकोला शहरात प्रवेश करण्यास मुंबई उच्च न्यायालयाच्या नागपूर खंडपीठाने बंदी घातली आहे. रामदासपेठ पोलीस ठाण्याच्या हद्दीत येत असलेल्या गवळीपुरा येथे २६ जून २0१४ रोजी शेख अक्रम नौरंगाबादी व शेख सलीत नौरंगाबादी या दोन भावंडांवर सशस्त्र प्राणघातक हल्ला करण्यात आला होता. या हल्ल्यात गंभीर जखमी झालेल्या दोघांवरही शहरातील खासगी रुग्णालयात उपचार सुरू असतानाच शेख अक्रम नौरंगाबादी यांचा २७ जून २0१४ रोजी उपचारादरम्यान मृत्यू झाला होता. या प्रकरणी रामदासपेठ पोलिसांनी प्राणघातक हल्ला करणारे शेख फरीद शेख सुलतान याच्यासह सात जणांविरुद्ध खुनाचा गुन्हा दाखल करून आरोपींना अटक केली होती. या हत्या प्रकरणातील शेख सुलतान आणि शेख रशीद या दोन आरोपींना न्यायालयाने जामीन मंजूर केला होता. यासोबतच माजी नगरसेवक शेख फरीद याला मुंबई उच्च न्यायालयाचे नागपूर खंडपीठातून जामीन मिळाला होता. दरम्यान, या प्रकरणी फिर्यादीचे वकील अँड. युसूफ नौरंगाबादी यांनी शेख सुलतान शेख यासीन या आरोपीचा जामीन रद्द करण्यासाठी उच्च न्यायालयात एक याचिका दाखल केली होती. यावर उच्च न्यायालयात सुनावणी झाली असून, न्यायालयाने शेख सुलतान, शेख फरीद व शेख रशीद या तिघांनाही अकोला शहरात प्रवेश करण्यास बंदी घातली आहे. नागपूर खंडपीठाच्या आदेशानुसार शेख अक्रम नौरंगाबादी हत्याकांडाची सुनावणी पूर्ण होईपर्यंंत या तिघांनाही अकोला शहरात प्रवेश करण्यास मनाई करण्यात आली आहे.