आलिमचंदानींच्या विरोधातील याचिकेवर २७ मार्चला सुनावणी

‘टीसी’मध्ये घोळ, नगरसेवक पदावर टांगती तलवार

अकोला, दि. १८- महानगरपालिकेच्या निवडणुकीत प्रभाग क्रमांक १२ मधून विजयी झालेले भाजपचे नगरसेवक हरीश आलिमचंदानी यांच्या निवडीस न्यायालयात आव्हान देण्यात आले असून, या आव्हान याचिकेवर २७ मार्च रोजी न्यायालयामध्ये सुनावणी होणार आहे. हरीश आलिमचंदानी यांनी अर्ज सादर करताना दाखल केलेले जातवैधता प्रमाणपत्र संशयास्पद असून, त्यांची टीसीही प्रचंड घोळाची असल्याचे न्यायालयात सादर करण्यात आल्याने त्यांच्या नगरसेवक पदावर टांगती तलवार आहे.प्रभाग क्रमांक १२ ब हा इतर मागासवर्गीयांसाठी राखीव ठेवण्यात आला होता. या प्रभाग क्रमांक १२ मधून हरीश आलिमचंदानी यांनी निवडणूक लढली. आलिमचंदानी यांच्यासह सहा उमेदवार १२ ब मधून रिंगणात होते. यामधील भाजपचे उमेदवार हरीश आलिमचंदानी विजयी झाले, तर अन्य पाच उमेदवारांचा पराभव झाला. यामधील मनोज साहू यांनी दिवाणी न्यायाधीश वरिष्ठ स्तर एस. डी. मिश्रा यांच्या न्यायालयात निवडणूक याचिका दाखल करून हरीश आलिमचंदानी यांचे जातवैधता प्रमाणपत्र संशयास्पद असल्याचा आरोप केला आहे. यावरून दिवाणी न्यायाधीश वरिष्ठ स्तर एस. डी. मिश्रा यांच्या न्यायालयाने हरीश आलिमचंदानी यांना १७ मार्च रोजी न्यायालयात हजर राहण्याचे आदेश दिले होते. त्यानंतर आता हरीश आलिमचंदानी यांच्या निवडी विरोधातील याचिकेवर २७ मार्च रोजी सुनावणी होणार आहे. न्यायालयाने आलिमचंदानी यांना कारणे दाखवा नोटिसही बजावली आहे. त्यामुळे सदर प्रकरण हरीश आलिमचंदानी यांच्या चांगलेच अंगलट येत असल्याची माहिती समोर आली आहे. याप्रकरणी मनोज साहू यांच्या वतीने अँड. चंद्रकांत वानखडे कामकाज पाहत आहेत.