खुशखबर; तीन दिवसाआड पाणीपुरवठा?

महापालिकेचा प्रयोग; जलकुंभनिहाय होणार पाणीपुरवठा.

अकोला: जलवाहिन्यांना लागणार्‍या गळत्या आणि त्यामधून धो-धो पाण्याची होणारी नासाडी तसेच जलकुंभाद्वारे पाणीपुरवठा न करता थेट मुख्य जलवाहिनीद्वारे पाणीपुरवठा करण्याच्या प्रकारामुळे पाण्याचे वेळापत्रक विस्कळीत झाले आहे. महापालिकेची तांत्रिक बाजू भक्कम नसल्यामुळे अकोलेकरांना सहा दिवसआड पाणीपुरवठा करण्याची नामुष्की प्रशासनावर ओढवली. या सर्व प्रकाराला चाप लावण्यासाठी जलप्रदाय विभागाचे कार्यकारी अभियंता सुरेश हुंगे, शहर अभियंता अजय गुजर यांनी प्रायोगिक तत्त्वावर जलकुंभनिहाय संबंधित भागाला पाणीपुरवठा करण्याचा निर्णय घेतला असून, याची सुरुवात शुक्रवारी केशवनगरस्थित जलकुंभावरून होणार आहे. आजरोजी महान (काटेपूर्णा प्रकल्प) धरणात २८ टक्के जलसाठा उपलब्ध आहे. अर्थातच, पाण्याचे काटेकोर नियोजन करण्याची मोठी जबाबदारी मनपाच्या जलप्रदाय विभागावर येऊन ठेपली आहे. मनपाद्वारे अकोलेकरांना सहा दिवसआड पाणीपुरवठा केला जात असून, तांत्रिक बाजू भक्कम केल्यास भविष्यात किमान चार किंवा तीन दिवसआड पाणीपुरवठा करणे शक्य आहे. आजपर्यंत जलप्रदाय विभागातील कार्यकारी अभियंता पद रिक्त होते. सक्षम अधिकारी नसल्याने मानधन तत्त्वावर कार्यरत कर्मचार्‍यांनी पाणीपुरवठय़ाचे कामकाज चालवले. यादरम्यान, महाराष्ट्र जीवन प्राधिकरणचे कार्यकारी अभियंता सुरेश हुंगे यांची मनपाच्या जलप्रदाय विभागात बदली झाली. पाणीपुरवठय़ाची विस्कटलेली घडी रुळावर आणण्यासाठी कार्यकारी अभियंता हुंगे आणि शहर अभियंता गुजर यांनी पाणीपुरवठय़ाचा आराखडा तयार केला. यापूर्वी महान येथून पाण्याचा उपसा केल्यानंतर तो जलकुंभापर्यंत न पोहचविता थेट मुख्य जलवाहिनीद्वारे नागरिकांपर्यंत पोहोचविल्या जात होता. यामुळे पाण्याची प्रचंड नासाडी होण्यासोबतच शेवटच्या वस्त्यांपर्यंत पाणी मिळत नसल्याची स्थिती होती. शिवाय लोकसंख्येच्या तुलनेत नेमके किती लीटर पाणी नागरिकांना दिल्या जात आहे, याचा हिशेबही जुळत नव्हता. याअनुषंगाने प्रशासनाने प्रायोगिक तत्त्वावर जलकुंभनिहाय पाणीपुरवठा करण्याचा निर्णय घेतला आहे. याची सुरुवात केशवनगरस्थित जलकुंभावरून होणार आहे. एका जलकुंभावरून सकाळी तसेच सायंकाळी संबंधित भागाला टप्प्याटप्प्याने पाणीपुवठा केला जाईल. जलकुंभाद्वारे होणार्‍या पाणीपुरवठय़ाला दाब राहणार असल्याने शेवटच्या घटकापर्यंंत पाणी पोहोचण्यास मदत होण्याचा मनपाला विश्‍वास आहे. हा प्रयोग यशस्वी झाल्यास अकोलेकरांना चार किंवा तीन दिवसआड पाणीपुरवठा होण्याची शक्यता आहे.