-ऑनलाइन लोकमत
वाशिम, दि.11- तालुक्यातील हिवरा या गावात बसणारा गणपती नवसाला पावणारा गणपती म्हणून प्रसिद्ध आहे. भाविकांच्या श्रद्धास्थानी असणा-या या गणपतीच्या दर्शनासाठी गणेशोत्सवादरम्यानच नव्हे तर वर्षभर भाविकांची अक्षरश: रिघ लागलेली असते.
लोकमान्य बाळ गंगाधर टिळक यांनी स्वातंत्र्यपूर्व काळात सार्वजनिक गणेशोत्सव साजरा करण्याची मुहूर्तमेढ रोवली. तेव्हापासून गावात गणेशोत्सव साजरा केला जातो. यंदा गणेशोत्सवाचे १०० वे वर्ष आहे. तथापि, हिवरा गणपती येथील गणेश मंदिराचे वैशिष्ट्य म्हणजे या मंदिरात गणेशमुर्तीसोबतच माता पार्वतीची आकर्षक मूर्ती स्थापित करण्यात आली आहे. गावक-यांच्या पुढाकारातून सन २००९ मध्ये भव्य मंदिर उभारण्यात आले. त्यात गणेशमुर्तीसोबतच माता पार्वतीची आकर्षक मुर्ती स्थापन करण्यात आली.
ज्याठिकाणी मंदिर उभारल्या गेले तेथे पुरातन काळात प्रत्यक्ष माता पार्वती व श्रीगणेशाचे काही दिवस वास्तव्य असल्याची अख्यायिका आहे. त्यामुळे याठिकाणी कुठलाही नवस बोलल्यास तो विनासायास पूर्ण होतो, अशी भाविकांची अतुट श्रद्धा आहे. या मंदिरावर होमहवन, गणेशयाग, अभिषेक, सहस्त्रवर्तन, धार्मिक ग्रंथाचे पारायण, समाजप्रबोधनपर किर्तन, प्रवचन आदी कार्यक्रमांसह महाप्रसादाचे वितरण केले जाते.