रिसोड मतदारसंघात खाली पंजा आणि वर...!

अकोला लोकसभा मतदारसंघात येणार्‍या आणि वाशिम जिल्ह्यातील रिसोड विधानसभा मतदारसंघाची निवडणूक यावेळी चांगलीच गाजली.

अकोला: अकोला लोकसभा मतदारसंघात येणार्‍या आणि वाशिम जिल्ह्यातील रिसोड विधानसभा मतदारसंघाची निवडणूक यावेळी चांगलीच गाजली. या मतदारसंघात लोकसभेत भाजपला आघाडी मिळाली तर विधानसभा पोटनिवडणुकीत काँग्रेसचा विजय झाला. यावरून प्रचारादरम्यान खाली पंजा आणि वर भाजपचे संजय धोत्रे यांना पाठिंबा मिळत असल्याची चर्चा तंतोतंत खरी ठरली आहे. माजीमंत्री सुभाष झनक यांच्या निधनामुळे रिक्त झालेल्या रिसोड विधानसभा मतदारसंघात लोकसभेसोबतच पोटनिवडणूक घेण्यात आली. या पोटनिवडणुकीचा निकालही शुक्रवारी जाहीर झाला. सुभाष झनक यांचे पुत्र अमित झनक यांनी ७३३९१ मतांसह भाजपचे विजय जाधव यांच्यावर विजय मिळविला. जाधव यांना ६१२८५ मतं मिळाली. पोटनिवडणुकीत काँग्रेस उमेदवाराला मिळालेल्या मतांच्याबरोबरीनेच लोकसभेत भाजपचे संजय धोत्रे यांना या विधानसभा मतदारसंघातून मतं मिळाली आहेत. त्यांनी या मतदारसंघात ७९२२४ मतं मिळवून प्रतिस्पर्धींवर आघाडी मिळविली. भाजपच्या उमेदवाराला विधानसभेत ६१२८५ मतं मिळाली. लोकसभा आणि विधानसभेतील भाजपच्या उमेदवारांमध्ये मतांची तफावत मोठी आहे. याउलट काँग्रेस आणि भाजपच्या उमेदवारांना विधानसभा आणि लोकसभेत मिळालेल्या मतांमध्ये फारशी तफावत नाही. या मतदारासंघात माजी मंत्री अनंतराव देशमुख यांच्याकडे काँग्रेसच्या प्रचाराची धुरा होती. अमित झनक हे युवक काँग्रेसचे राजकारणात अनंतराव देशमुख यांचे पुत्र अमित यांचा प्रतिस्पर्धी मानला जातो. त्यामुळे या विधानसभेच्या पोटनिवडणुकीकडे संपूर्ण राज्याचे लक्ष लागले होते. निकालानंतरच्या आकडेवारीवर नजर टाकली तर विधानसभेत काँग्रेस आणि लोकसभेत भाजपला मिळालेल्या मतांमध्ये बरेच साम्य आहे. याचाच अर्थ खाली काँग्रेस आणि वर भाजप चालविला जात असल्याची प्रचारादरम्यानची चर्चा तंतोतंत खरी ठरली आहे. या विधानसभा मतदारसंघात भारिपचे अरुण क्षीरसागर यांना २९५0९ मतं मिळाली असून, त्यांनी ही मतं लोकसभेत प्रकाश आंबेडकर यांच्याकडेही वळती केल्याचे स्पष्ट होते. या विधानसभा मतदारसंघात प्रकाश आंबेडकर यांना ३0४७६ मतं मिळाली.