अहमदनगर : पंतप्रधान नरेंद्र मोदी यांचे फलक हटविल्यावरून महापालिकेत पडद्याआडून जोरदार हालचाली सुरू आहेत. पदाधिकाऱ्यांकडून कारवाईबाबत प्रशासनाकडे विचारणा होऊ लागली असून, प्रशासनाने मात्र अजून तोंड उघडलेले नाही. त्यामुळे मोदी यांच्या फलकावरील गूढ आणखी वाढले आहे.
महापालिकेच्या अतिक्रमण निर्मूलन विभागाने पंतप्रधान नरेंद्र मोदी यांच्या फलकावर कारवाई केली. लसीकरण केंद्राबाहेर लावलेले फलक पथकाने हटविले. प्रशासनाच्या या कारवाईवरून महापालिकेत कमालीची अस्वस्थता आहे. भाजपच्याच जाहिरात फलकांवरच कारवाई का, असा सवाल भाजपकडून उपस्थित केला जात आहे. महापालिकेत महाविकास आघाडीची सत्ता आहे. सेना, काँग्रेस आणि राष्ट्रवादी हे तिन्ही सत्तेत सहभागी आहेत. महापौर पद सेनेकडे आहे. राज्यात सेना व भाजपात आरोप-प्रत्यारोपांच्या फैरी झडत असल्या तरी नगरमध्ये मात्र य दोन्ही पक्षांमध्ये सलोख्याचे संबंध आहेत. त्यात अंतर पडणार नाही, याची काळजी सेना व भाजपकडून घेतली जात आहे. असे असताना पालिकेकडून खासदार डॉ. सुजय विखे यांच्या जाहिरात फलकावर कारवाई केली गेली. त्यामुळे भाजपमधून नाराजी व्यक्त होत आहे. त्यात पालिकेत सत्तांतर झाल्यानंतरची प्रशासनाची ही पहिलीच कारवाई आहे. प्रशासनाची ही कारवाई सेना व भाजपमधील दरी निर्माण करणारी आहे. प्रशासनाने केलेल्या कारवाईबाबत पदाधिकाऱ्यांकडून विचारणा होऊ लागली आहे. परंतु, प्रशासनाकडून तक्रारदाराचे नाव उघड केले गेले नाही. त्यामुळे या कारवाईचे गूढ आणखी वाढले असून, भाजप याबाबत काय भूमिका घेते, याबाबत उत्सुकता आहे.
....
शहरातील ४९३ जाहिरात फलक अधिकृत
महापालिकेने शहरातील ४९३ जाहिरात फलकांना परवानगी दिली आहे. उर्वरित फलक अनधिकृत असून, या फलकांवर पालिकेकडून कारवाई केली गेली नाही. यामध्ये बहुतांश फलक हे राजकीय पक्षांशी संबंधित आहेत. राजकीय पक्षांच्या फलकांवर कारवाई करण्याचे धाडस महापालिकेचे अधिकारी दाखवित नाहीत. मग भाजपचेच फलक असे अचानक कसे काढले गेले. त्यामागे कुणाचा हात आहे का, यासह अनेक प्रश्न यानिमित्ताने उपस्थित झाले आहेत.