अहमदनगर : वाढत्या उन्हाची दाहकता शरीराला लाहीलाही करून जाते. त्यासाठी अनेक जण उन्हाळी पीक असलेल्या टरबुजाचे सेवन करतात. मात्र, कोरोनाच्या सावटाने बाजारपेठ बंद असल्याने सध्या टरबूज शेतातच सडत आहेत. थंड फळ म्हणून टरबुजाला मोठी मागणी असते. परंतु मागील एका वर्षापासून कोरोनासंक्रमण काळात टरबुजाच्या शेतीचे मोठे नुकसान शेतकऱ्यांना सोसावे लागत आहे. सध्या बाजारपेठा बंद असल्याने शेतात टरबूज पडून आहेत. त्यामुळे सर्व टरबूज खराब होण्याच्या मार्गावर आहेत. जिल्ह्यात दोन हजार एकर शेतजमिनीवर टरबुजाची लागवड करण्यात आलेली आहे. परंतु लॉकडाऊनमुळे बाजारपेठा बंद आहेत. त्यामुळे शेतातील टरबूज कुठे विक्री करावे, असा प्रश्न शेतकऱ्यांना आहे. टरबुजाची शेतीही महाग आहे. बी-बियाण्यापासून तर टरबुजाची वाढ होईपर्यंत शेतकऱ्यांना टरबुजाला जपावे लागते. कीड लागू नये म्हणून अनेक महागड्या रासायनिक द्रव्यांचा वापर करावा लागतो. ही सर्व रासायनिक औषधे महागडी आहेत. सध्या लागवडीचा खर्चसुद्धा या टरबूज उत्पादनातून निघत नाही.--
तापमान वाढल्याने वेली करपल्या
महिन्यापूर्वी टरबुजांच्या वेली कळी अवस्थेत असताना अचानक तापमान वाढले. त्यामुळे अनेक ठिकाणच्या टरबूज वेली करपून गेल्या तर काही ठिकाणी वेलीच्या कळ्यांची गळ झाली. त्यामुळे त्याचा परिणाम उत्पादनावर झाला आहे. त्यातच पुढे कडक लाॉकडाऊन सुरू झाल्याने उत्पादन झालेला माल ग्राहकांअभावी शेतातच राहिला आणि करपून गेल्याचे शेतकरी सांगत आहेत.
---
लॉकडाऊनमुळे बाजारपेठा बंद आहेत, तर काही ठिकाणी मर्यादित वेळा दिल्याने टरबूज विक्रीची समस्या निर्माण झाली आहे. सध्या शेतात टरबूज मोठ्या प्रमाणात लागले आहेत. कोरोनामुळे टरबूज खरेदी करण्यास व्यापारी धजावत नाहीत. त्यामुळे शेतातील टरबुजांची विक्री कुठे करावी? असा प्रश्न आहे. लागवडीचा खर्चही या वर्षी निघाला नाही. त्यामुळे शासनाने फळबाग लागवड करणाऱ्या शेतकऱ्यांना आर्थिक मदत करावी.
- डॉ. शिवनाथ घोरपडे,
शेतकरी, पिंपरी निर्मळ, ता. राहाता.
--
फोटो- मेलवर (सीडी व फोटोडेस्क)