पिंपळगाव पिसा येथे मेगा लसीकरण

पिंपळगाव पिसा प्राथमिक आरोग्य केंद्रात लसीकरणासाठी स्थानिक नागरिकांना सतत संघर्ष करावा लागत असल्याच्या तक्रारी केल्या जात होत्या. त्या तक्रारींची दखल घेऊन तालुका आरोग्य अधिकारी डॉ. नितीन खामकर यांनी शनिवारी एक हजार लस उपलब्ध करून देण्याचा प्रयत्न केला. या एक हजार लस केवळ पिंपळगाव पिसा येथील नागरिकांना देण्याचे नियोजन प्राथमिक आरोग्य केंद्राच्या आरोग्य अधिकारी डॉ. जयदेवी राजेकर व डॉ. तबसूम पठाण यांनी केले. प्राथमिक आरोग्य केंद्रात गर्दीमध्ये लसीकरण करणे शक्य नसल्याने पंडित जवाहरलाल नेहरू विद्यालयात लसीकरणाची व्यवस्था करण्यात आली होती. या ठिकाणी आरोग्य यंत्रणेला गावातील स्वयंसेवकांनी मदत केली. पिंपळगाव पिसा प्राथमिक आरोग्य केंद्राच्या कार्यक्षेत्रात १३ हजार ६०० लसीकरणाचे डोस पूर्ण झाले आहेत. कोळगाव प्राथमिक आरोग्य केंद्राच्या कार्यक्षेत्रात १३ हजार ९४६ लसीकरणाचे डोस पूर्ण झाले आहेत. कोळगाव प्राथमिक आरोग्य केंद्रात आरोग्य अधिकारी डॉ. अमोल अडसरे, डॉ. प्राजक्ता निमसे व आरोग्य कर्मचारी लसीकरण सुरळीत व्हावे, यासाठी प्रयत्न करत आहेत.