डिझेल बंद, बसेस आगारातच

श्रीरामपूर : जिल्ह्यातील काही एसटी महामंडळाच्या आगारांना डिझेल टंचाईची झळ पोहोचत आहे. लीटरमागे ९६ रुपयांवर डिझेल दरवाढ झाल्यामुळे बसेस बंद ठेवण्याची नामुष्की आगारांवर आली आहे. नगर जिल्ह्यात एसटीचे ११ आगार आहेत. या सर्वच आगारांमध्ये डिझेलच्या टँकरसाठी एक किंवा दोन दिवस प्रतीक्षा करण्याची वेळ येत आहे. मात्र याबाबत आगार प्रमुख प्रतिक्रिया देण्यास पुढे येत नसल्याचे चित्र आहे.

श्रीरामपूर येथील आगार प्रमुख राकेश शिवदे यांच्याशी संपर्क साधला असता ते म्हणाले, काही बसेसना प्रवासी मिळत नाहीत. त्यामुळे तोट्यामध्ये त्या चालविण्यात अर्थ नाही. त्या बंद ठेवण्यात आल्या आहेत. उत्पन्न नसेल तर डिझेल उपलब्ध होत नाही. डिझेलचे दर ९५ रुपयांवर गेल्याने आर्थिक घडी विस्कटली आहे. श्रीरामपूर येथील आगाराला दर दोन दिवसानंतर एका डिझेल टँकरची आवश्यकता भासते. त्यामध्ये १२ हजार लीटर डिझेल भरलेले असते. त्यापोटी ११ ते १२ लाख रुपये खर्च होतो. मात्र त्या तुलनेत आगाराला उत्पन्न मिळत नाही.

---------

कर्जत आणि श्रीगोंद्याला फटका

श्रीगोंदा येथील आगाराचा इंधन साठा तीन दिवस संपल्यामुळे तेथे ५३ पैकी ४३ बसेस आगारातच उभ्या ठेवण्याची वेळ आली होती. १२ ऑगस्टला हा प्रकार घडला. आगारातील केवळ १० बसेसच्या फेऱ्या पूर्ण होऊ शकल्या होत्या. कर्जत येथे स्वतंत्र आगार नाही. त्यामुळे तेथे श्रीगोंदा येथून बसेस दाखल होतात. श्रीगोंदा आगाराची स्थिती डिझेलअभावी बिकट झाल्याने कर्जतला त्याचा फटका बसला होता.

-------------

एखाद-दुसऱ्या आगारामध्ये डिझेल टंचाईची स्थिती उद्भवते. मात्र कुठेही चिंताजनक परिस्थिती नाही. स्थानिक आगाराच्या उत्पन्नावर डिझेलचा पुरवठा अवलंबून नाही. विभागीय स्तरावरूनच ते पुरविले जाते.

- विजय गीते, विभागीय नियंत्रक, नगर.

---------

१०५३