रेमडेसिविरचा काळाबाजार सुरूच

कोविड रुग्णांचा सीटी स्कॅन स्कोअर जास्त असेल तर डॉक्टर रेमडेसिविर इंजेक्शन सुरू करतात. मात्र, या इंजेक्शनचा तुटवडा आहे. जिल्हा प्रशासनाने ही इंजेक्शन आता केवळ कोविड सेंटरमध्ये मिळतील असे धोरण जाहीर केले आहे. मात्र, प्रत्यक्षात या हॉस्पिलमध्येही ही इंजेक्शन उपलब्ध होत नाहीत. आम्ही जिल्हाधिकारी कार्यालयाकडे मागणी करत आहोत. मात्र, इंजेक्शन मिळत नाही, असे अनेक हॉस्पिटल्सचे म्हणणे आहे.

रुग्णांना बाहेर मेडिकल शॉपमध्येही इंजेक्शन मिळायला तयार नाही. या सर्व बाबींचा गैरफायदा काळाबाजार करणारे घेत आहेत. १० ते २० हजार रुपयांपर्यंत एक इंजेक्शन विकले जात आहे. रुग्णांचा जीव वाचविण्यासाठी नातेवाईकही काळ्या बाजारातून नाइलाजाने इंजेक्शन खरेदी करत आहेत.

.......................

प्रशासनाकडून तपासणीच नाही

प्रशासनाने तातडीने यापूर्वी वितरित करण्यात आलेल्या रेमडेसिविरचा साठा तपासल्यास काळाबाजार करणारे तातडीने शोधले जाऊ शकतात. मात्र, प्रशासन यापूर्वी वाटप झालेला साठाच तपासायला तयार नाही. त्यामुळे काळाबाजार करणाऱ्यांचे फावले आहे. यात गरीब रुग्णांचे हाल होत असून त्यांना कोठेच इंजेक्शन मिळायला तयार नाही, अशी परिस्थिती आहे.

.........

नागरिकांनी तक्रारी करणे आवश्यक

काळाबाजार करणाऱ्यांविरोधात नागरिकांनी तक्रारी केल्यास असे लोक गजाआड होऊ शकतात. मात्र, याबाबत नागरिकांनी पुराव्यांनिशी तक्रार करणे आवश्यक आहे. नागरिकांनी केलेल्या अशा तक्रारींमुळे अनेक रुग्णांचे जीव वाचू शकतात.