संगमनेर : तहसील कार्यालयापासून हाकेच्या अंतरावर असलेले स्वस्त धान्य दुकान नेहमीच उशिराने उघडत असल्याची लाभार्थ्यांची तक्रार आहे. गुरुवारी (दि. २९) दुपारी बाराच्या सुमारास दुकान उघडले नसल्याने रेशन घेण्यासाठी आलेले वयोवृद्ध लाभार्थी दुकानाच्या पायरी, ओट्यावर ताटकळत बसले होते. रेशन दुकानदाराचा मनमानी कारभार सुरू असून, पुरवठा विभाग कुठलीही ठोस कारवाई करायला तयार नाही.
रेशनकार्डधारकांना धान्य घेणे सोईचे होण्यासाठी सरकार मान्य स्वस्त धान्य दुकाने दररोज सकाळी सात ते दुपारी एक आणि दुपारी दोन ते रात्री त्या दिवशीचे लाभार्थ्यांना धान्य वाटप संपेपर्यंत उघडे राहतील, असा नियम आहे; मात्र संगमनेर तहसील कार्यालयापासून हाकेच्या अंतरावर असलेले स्वस्त धान्य दुकान नेहमीच उशिराने उघडत असल्याचे लाभार्थ्यांनी सांगितले. रेशन घेण्यासाठी आलेल्या वयोवृद्ध रेशन दुकानदार कधी येऊन दुकान उघडले आणि आपल्याला रेशन मिळेल, याची वाट पाहत होते. रेशन दुकान वेळेत उघडणे अनिवार्य आहे. कोरोनाच्या पार्श्वभूमीवर सध्या दुकाने चारपर्यंत उघडी असतात. त्यात रेशन दुकानदार दुकान उशिरा उघडतो. कोरोनाचा संसर्ग टाळण्यासाठी गर्दी करू नये, असा नियम आहे; मात्र दुकान उशिरा उघडत असल्याने लाभार्थ्यांची गर्दी होऊन नियमांचे उल्लंघन होते आहे.
----------
ठोस कारवाई करण्याची मागणी
तहसील कार्यालयाजवळ असलेल्या स्वस्त धान्य दुकानाबाबतच्या तक्रारी यापूर्वी तहसीलदार अमोल निकम यांना प्राप्त झाल्या होत्या. लाभार्थी धान्य घ्यायला वेळेत येऊनही दुकान बंद आढळून आल्याने संबंधित दुकानदाराकडे तहसीलदार निकम यांनी खुलासा मागतिला होता; मात्र त्यानंतरही रेशन दुकानदार दुकान उशिराने उघडत असल्याने ठोस कारवाई करण्याची मागणी लाभार्थ्यांकडून होत आहे.
----------------
दोन्हीकडून होते नुकसान
रेशन घ्यायला आल्यानंतर दुकान बंद असते. कामावर खाडे करून रेशन घ्यायला यावे लागते. कोरोनामुळे दुपारी चारपर्यंत दुकाने उघडी असल्याने काम कमी झाले आहे. त्यामुळे पगार कमी झाला आहे. रेशन दुकान बंद असल्याने रेशन मिळत नाही आणि कामाचेसुद्धा खाडे होते. त्यामुळे दोन्हीकडून नुकसान होत असल्याचे एका पुरुष लाभार्थ्याने सांगितले.
------------------
फोटो नेम : २९ रेशन दुकान, संगमनेर, ओळ : दुपारी बारा वाजेच्या सुमारास रेशन दुकान उघडले नसल्याने रेशन दुकानदाराची वाट पाहत ताटकळलेले वयोवृद्ध लाभार्थी.