पांढरकवडा : तालुक्यातील जवळपास प्रत्येक खेड्यामध्ये अवैध व्यवसाय करणार्या बोगस डॉक्टरांचा मोठय़ा प्रमाणात सुळसुळाट झाला आहे. या बोगस डॉक्टरांच्या चुकीच्या औषधोपचाराने आदिवासी आणि गरीब रुग्णांचे आरोग्य धोक्यात सापडले आहे.
तालुक्यातील अनेक गावांमध्ये बोगस डॉक्टरांनी आपले बस्तान मांडले आहे. काही बोगस डॉक्टर तर आपली बॅग घेऊन खेडोपाडी फिरुन आदिवासी गरीब रुग्णांवर चुकीचे औषधोपचार करीत आहेत. या डॉक्टरांजवळ महाराष्ट्र मेडीकल कौन्सिलचे कोणतेही प्रमाणपत्र नाही. परंतु आपण असाध्य रोगही दुरुस्त करीत असल्याचा खोटा प्रचार ही बोगस डॉक्टर मंडळी करीत आहे.
महाराष्ट्र मेडिकल कौन्सिलचे कोणतेही प्रमाणपत्र नसलेल्या या तथाकथित डॉक्टरांकडून अल्प किंमतीत औषधोपचार मिळत असल्यामुळे परिसरातील भोळी-भाबडी जनता त्यांच्या भूलथापांना बळी पडत आहे. या डॉक्टरांचे एजंटही परिसरात सक्रिय असून ते असाध्य रोग दुरुस्त होत असल्याचा खोटा प्रचार करीत आहेत. त्यांच्या या खोट्या प्रचाराला अनेक आदिवासी रुग्ण बळी पडत आहे.
तालुक्यात सहा प्राथमिक आरोग्य केंद्र असून या आरोग्य केंद्राच्या कार्यक्षेत्रात जवळपास २0 ते २५ बोगस डॉक्टर सक्रिय आहेत. सदर डॉक्टर रुग्णांची तपासणी करुन त्यांना औषधी, गोळया, इंजेक्शन जवळचे देतात. यातून रुग्णांची आर्थिक पिळवणूक होत आहे. तालुक्यात सर्वत्र संचार असलेल्या या बोगस डॉक्टरांनी रुग्णांच्या जिवीताशी खेळ सुरु केला आहे.
वैद्यकीय क्षेत्राची कोणतीही पदवी नसली, तरी मोठय़ा आत्मविश्वासाने हे बोगस डॉक्टर रुग्णांवर उपचार करताना दिसून येतात. ग्रामीण भागातील नागरिकांना वेळेवर डॉक्टर उपलब्ध होत नसल्याने नाईलाजाने या डॉक्टरांचाच आधार घ्यावा लागतो. मध्यंतरी या बोगस डॉक्टर मंडळीविरुध्द काही जागरुक नागरिकांनी पांढरकवडा पोलीस ठाण्यात तक्रार दाखल केली होती. पोलिसांनी गुन्हाही नोंदविला होता. परंतु त्याचा कोणताही परिणाम झाला नाही. या बोगस डॉक्टरांचा शोध घेऊन त्यांच्याविरुद्ध कठोर कारवाई करण्याची गरज निर्माण झाली आहे. (तालुका प्रतिनिधी)