मोकाट जनावरांमुळे अपघातास आमंत्रण

मोकाट जनावरांना पकडून त्यांना कोंडवाड्यात टाकणे व जनावरांच्या मालकांकडून दंड वसूल करणे गरजेचे आहे. तसे केल्यास मोकाट जनावरांवर अंकुश लावला जाऊ शकतो. पण मोकाट जनावरांच्या मालकांवर कुठलीही कारवाई होत नसल्याने आणि जनावरांना पकडल्यास त्यांना ठेवण्यासाठी कुठलीही व्यवस्था नसल्याने नगरपंचायत प्रशासन दुर्लक्ष करीत आहे. शहरात जुने बस स्टँड ते अकोला फाटा जुने बस स्टँड ते शेलू फाटा जोगदंड हॉस्पिटल ते गांधी चौक गांधी चौक ते शिव चौक आठवडी बाजार ते तहसील रोड रस्त्यावर ठिकठिकाणी जनावराचे कळप दिसून येतात. आदी मार्गांवर दिवसभर मोकाट जनावरे फिरत असतात. दुभाजकांवर उभे राहाणे, दुभाजकांनाच रेटून बसणे, रस्त्यांच्या मधोमध उभे राहाणे असे प्रकार जनावरे करीत असतात. शहरात आधीच वाहतुकीची कोंडी झाली आहे. त्यातच अतिक्रमणही वाढले आहे. त्यामुळे रस्त्यावरील जनावरांचा संचार वाहनचालकांसाठी धोक्याचा ठरत आहे.

शहरात सर्वत्र मोकाट जनावरांना मुक्त संचार आढळतो. रस्तोरस्ती जनावरे कधी कळपाने, तर कधी एकटीदुकटी फिरत असतात. अशा मोकाट जनावरांचा नगरपंचायतीने तातडीने बंदोबस्त करावा, अशी मागणी जनतेतून होत आहे.