................
अवैध प्रवासी वाहतुकीकडे दुर्लक्ष
वाशिम : येथून कनेरगावकडे जाणाऱ्या मार्गावर गत काही दिवसांपासून अवैध प्रवासी वाहतूक जोमात सुरू असून याकडे पोलीस प्रशासनाचे दुर्लक्ष होत आहे. याबाबत मनीष शिंदे यांनी जिल्हा वाहतूक शाखेकडे शुक्रवारी तक्रार दाखल करून कारवाईची मागणी केली.
..............
ओल्या कचऱ्यावर प्रक्रिया प्रलंबित
वाशिम : स्थानिक डम्पिंग ग्राऊंडवर ओल्या कचऱ्यावर प्रक्रिया करण्यासाठी व्यवस्था उभारण्यात आली आहे; मात्र अद्याप त्या ठिकाणी हे काम सुरू झालेले नाही. याकडे न.प. प्रशासनाने लक्ष पुरवावे, अशी मागणी शब्बीर परसुवाले यांनी शुक्रवारी निवेदनाव्दारे केली.
................
आरोग्य तपासणी शिबिरास प्रतिसाद
वाशिम : स्थानिक जिल्हा सामान्य रुग्णालयात बुधवार, १ सप्टेंबर रोजी रोजी आयोजित आरोग्य तपासणी शिबिरास प्रतिसाद मिळाला. यावेळी विविध आजारांमधील शंभरापेक्षा अधिक रुग्णांची तपासणी करून औषधोपचार करण्यात आल्याची माहिती जिल्हा शल्य चिकित्सक डॉ. मधुकर राठोड यांनी दिली.
................
जलव्यवस्थापनाविषयी जनजागृती
वाशिम : समृद्ध गाव स्पर्धा उपक्रमांतर्गत सध्या मंगरूळपीर व कारंजा तालुक्यातील गावांमध्ये ऑनलाईन प्रशिक्षण देणे सुरू आहे. यामाध्यमातून प्रामुख्याने जलव्यवस्थापनाविषयी जनजागृती केली जात आहे. यासह मृदा संवर्धनासंबंधी मार्गदर्शन केले जात आहे.
....................
छत्रपती शिवरायांच्या पुतळ्यास जलाभिषेक
वाशिम : ‘३६५ दिवस शिवजलाभिषेक सोहळा’ या उपक्रमांतर्गत येथील छत्रपती शिवरायांच्या पुतळ्यास गुरुवारी जलाभिषेक करण्यात आला. यावेळी शिवम बेंद्रे, योगेश लोनसुने, स्वप्निल विटोकार, डॉ. मोहन गोरे, ऋषिकेश अंभोरे आदिंची उपस्थिती होती.
.................
वाशिम पोलिसांकडून रात्रगस्त वाढविली
वाशिम : रात्रीच्या सुमारास होणाऱ्या चोऱ्या, घरफोड्यांवर नियंत्रण मिळविण्यासाठी वाशिम पोलिसांनी रात्रगस्त वाढविली आहे. नागरिकांना रात्रीच्या सुमारास कुठेही संशयास्पद प्रकार सुरू असल्याचे आढळून आल्यास तात्काळ संपर्क साधावा, असे आवाहन करण्यात आले आहे.
...............
पादचारी मार्ग अतिक्रमणाच्या विळख्यात
वाशिम : येथील श्री शिवाजी विद्यालयापासून आंबेडकर चौकापर्यंतच्या रस्त्याच्या कडेला असलेला पादचारी मार्ग अतिक्रमणाच्या विळख्यात अडकला आहे. लघु व्यावसायिकांना पर्यायी जागा उपलब्ध करून पादचारी मार्ग मोकळा करावा, अशी मागणी होत आहे.