वाशिम : गत काही दिवसांपासून जिल्ह्यात ढगाळ वातावरण असून, याचा अस्थमा रुग्णांना अधिकचा धोका असतो. त्यामुळे आरोग्याची अधिक काळजी घ्या, असा सल्ला वैद्यकीय तज्ज्ञांनी दिला.
वातावरणातील बदलामुळे विविध आजार उद्भवत आहेत. अस्थमा रुग्णांसाठी बदलते वातावरण त्रासदायक असते. परंतु सध्या कोरोनाचा संसर्ग आणि त्यात रोगराईला निमंत्रण देणारे हे वातावरण असल्याने आरोग्य जपणे आवश्यक ठरत आहे. अस्थमाचे जे जुने रुग्ण आहेत, त्यांचा त्रास वाढत आहे. रुग्णालयात अशा रुग्णांची संख्याही वाढलेली दिसून येते.
०००००
प्रतिकारशक्ती कमी
अस्थमा रुग्णांची तुलनेने प्रतिकारशक्ती कमी असते. त्यामुळे इतर आजारांची लवकर लागण होऊ शकते. प्रतिकारशक्ती कमी असल्याने त्यांना इतर जंतूंचा धोका जास्त असतो. सध्या व्हायरल इन्फेक्शन असल्याने सर्दी, खोकला, ताप यासह इतर आजारांचे रुग्ण वाढलेले आहेत.
००००
बालकांमध्ये अस्थमा
अस्थमा हा केवळ वयोवृद्धांना नाही, तर युवक व लहान मुलांनाही याचा त्रास होतो. जिल्ह्यात पाच वर्षांपासूनच्या काही मुलांवर सध्या अस्थमाचा उपचार सुरू आहे.
०००००
ही घ्या काळजी
कुठल्याही परिस्थितीत डाॅक्टरांनी दिलेले नियमित वापराचे औषध बंद करू नका. कोणत्याही परिस्थितीत आपले औषध वेळेवर घेणे महत्त्वाचा उपाय आहे.
ॲलर्जीकारक वस्तूंशी संपर्क टाळा. अनेकदा दम्याबरोबर ॲलर्जिक सर्दीसुद्धा सोबत असते. त्यासाठी नाकातील स्टेरॉईड स्प्रे डॉक्टरांच्या सल्ल्यानुसार सुरू करा.
०००००
तज्ज्ञ म्हणतात...
ढगाळ वातावरणात अस्थमाचे रुग्ण आहेत, यांना ॲलर्जी, रिॲक्शन येणे असा त्रास होतो. त्यात दम्याचे प्रमाणही वाढत आहे. सध्या व्हायरल इन्फेक्शनसुद्धा आहे. त्यामुळे इतर जंतूंचे प्रमाण या रुग्णांवर लवकर अटॅक करतात. त्यामुळे रुग्णांनी वेळीच उपचार घ्यावे.
- डॉ. प्रवीण ठाकरे
छातीरोग तज्ज्ञ, वाशिम