आश्वासनानंतर ‘त्या’ २० शिक्षकांचे उपोषण मागे

२१ डिसेंबर रोजी शिक्षणाधिकारी (माध्य), जि. प. वर्धा यांच्या कार्यालयासमोर २० शिक्षकांनी मागण्यांसाठी बेमुदत उपोषण सुरू केले होते.

वैयक्तिक मान्यता न मिळाल्याने शिक्षकांची होत आहे उपासमार
वर्धा : २१ डिसेंबर रोजी शिक्षणाधिकारी (माध्य), जि. प. वर्धा यांच्या कार्यालयासमोर २० शिक्षकांनी मागण्यांसाठी बेमुदत उपोषण सुरू केले होते. २३ डिसेंबर रोजी रात्री उशिरा शिक्षण उपसंचालक, नागपूर यांच्या सांगण्यावरून आंदोलन मागे घेण्यात आले.
२ मे २०१२ पूर्वी शिक्षणाधिकारी (माध्य.) कार्यालयाची पद भरण्याची परवानगी घेवून नियमानुसार केलेल्या ६४ शिक्षकांच्या नियुक्त्यांपैकी २० शिक्षकांना काही त्रुटी अभावी जानेवारी महिन्याच्या शिबिरात वैयक्तिक मान्यता मिळू शकली नाही. परंतु दरम्यानच्या काळात सदर शिक्षकांचे प्रस्ताव शिक्षण आयुक्त, पुणे यांच्या कार्यालयात शिक्षणाधिकारी यांच्या चुकीमुळे पाठविण्यात आल्याचा आरोप संघटनेद्वारे करण्यात आला होता. त्यामुळे मागील साडेतीन वर्षापासून सदर शिक्षक विना वेतन विद्यादानाचे काम करीत होते.
अन्यायग्रस्त शिक्षकांचे प्रस्ताव शिक्षण आयुक्त, पुणे यांच्या कार्यालयात प्रलंबित असल्यामुळे शिक्षणाधिकारी यांनी आॅगस्ट व आॅक्टोबर महिन्यात नियमानुसार घ्यावयाचे वैयक्तिक मान्यता शिबिराचे आयोजन केले नाही. दरम्यानच्या काळात अन्यायग्रस्त शिक्षकांसह वैयक्तिक मान्यता मिळण्याबाबत तक्रार निवारण समितीच्या वतीने तीनवेळा आंदोलने करण्यात आली. तरीही न्याय न मिळाल्याने त्या २० शिक्षकांनी पुन्हा २२ डिसेंबरपासून जि. प. समोर आंदोलन सुरू केले होते.
२३ डिसेंबरला शिक्षण उपसंचालक नागपूर यांनी १५ दिवसांच्या आत प्रस्ताव प्राप्त करून मान्यता देण्याची कार्यवाही करावी असे आदेश शिक्षणाधिकारी यांना २३ डिसेंबरला दिल्यानंतर रात्री उशिरा उपोषण स्थगित करण्यात आले. १५ दिवसात शिक्षण उपसंचालक यांच्या आदेशानुसार कार्यवाही न झाल्यास १६ व्या दिवशी पूर्ववत आंदोलन सुरू राहील, असा इशारा तक्रार निवारण समितीचे अजय भोयर यांनी शिक्षणाधिकारी कार्यालयाच्या प्रतिनिधींना उपोषणस्थळी दिला.
उपोषण मंडपाला जिल्हा परिषद सदस्य मनोज चांदुरकर, नाना ढगे, विलास कांबळे, समीर देशमुख, सतीश राऊत, रमेश टपाले, मनोहर वाके, पुंडलिक नागतोडे, रवी कोठेकर, नरेंद्र थुटे, विजय चौधरी, संजय बारी, रहिम शाह, इंद्रजीत ढोले, पुंडलिक राठोड, सुनील गायकवाड, गिरीश वानखेडे, साबळे, अजय कोल्हे, सतीश जगताप, यांच्यासह अनेकांनी पाठिबा दिला असून सर्वांचे कारवाईकडे लक्ष लागले आहे.(शहर प्रतिनिधी)