ठाणे रुग्णालय प्रशासन ‘त्या’ डॉक्टरांच्या पाठिशी

ठाणे महापालिकेच्या छत्रपती शिवाजी रुग्णालयात अतिरिक्त आयुक्तांनी मंगळवारी अचानक रुग्णालयाची झाडाझडती घेतली असता, विविध विभागातील तब्बल २३ डॉक्टर कामाच्या

ठाणे : ठाणे महापालिकेच्या छत्रपती शिवाजी रुग्णालयात अतिरिक्त आयुक्तांनी मंगळवारी अचानक रुग्णालयाची झाडाझडती घेतली असता, विविध विभागातील तब्बल २३ डॉक्टर कामाच्या वेळेत हजर नसल्याची बाब त्यांच्या निदर्शनास होती. त्यानंतर या डॉक्टरांना कारणे दाखवा नोटीस बजावण्यात आली आहे. परंतु, आता रुग्णालय प्रशासन या कामचुकार डॉक्टरांना पाठिशी घालण्याचा प्रयत्न करीत असून त्यांनी या कारवाईवरच आक्षेप घेतला आहे. दुसरीकडे हे डॉक्टर अद्यापही थम्ब मशिनला संलग्न नसल्याची भूमिका पालिका प्रशासने घेतली असून रुग्णालय प्रशासनाने मात्र या डॉक्टरांची रोज थम्ब मशिनद्वारे हजेरी घेतली जात असल्याचा दावा केला आहे. पालिका आणि रुग्णालय प्रशासनात आता या मुद्यावरुन सावळोगोंधळा निर्माण तर झाला आहेच, परंतु, गलेलठ्ठ पगार घेऊन गैरहजर राहणाऱ्या या डॉक्टरांमुळे रुग्णालयात दूरवरुन येणाऱ्या शेकडो रुग्णांचे मात्र हाल होत आहेत. त्यामुळे आता आयुक्त याबाबत कोणता निर्णय घेणार याकडे सर्वांचे लक्ष आहे.
ठाणे पालिकेच्या कळवा रुग्णालयात जिल्ह्याच्या विविध भागातून रोज हजारो रुग्ण उपचारासाठी येत असतात. बाह्यरुग्ण विभागात येणाऱ्या रुग्णांची संख्या ही १२०० च्या घरात आहे. तर आंतर रुग्णांची संख्या, ३०० च्या आसपास आहे.
रुग्णालय आणि रुग्णालय प्रशासनाची लक्तरे यापूर्वीदेखील वेशीला टांगली गेली आहेत. महासभा अथवा स्थायी समितीची सभा दोनही ठिकाणी सदस्यांनी कळवा रुग्णालय प्रशासनाच्या कारभाराचे धिंडवडे काढले आहेत. काही दिवसांपूर्वी झालेल्या स्थायीच्या बैठकीत तर कळवा रुग्णालयाच्या कारभारावरील चर्चेत या रुग्णालयातच स्थायीची बैठक घ्या, अशी मागणीच काही सदस्यांनी केली होती. असे असतांनाहीदेखील रुग्णालय प्रशासन आजही यातून काही बोध घेतांना दिसत नाही. रुग्णालयात येणाऱ्या प्रत्येक रुग्णाला योग्य आणि वेळेत उपचार मिळावेत म्हणून डॉक्टरांची फळी उभारण्यात आली आहे. परंतु असे असतांनाही देखील तज्ज्ञ डॉक्टरांऐवजी प्रशिक्षिणार्थी डॉक्टरांकडूनच रुग्णावर उपचार केले जात असल्याची माहिती आता या निमित्ताने समोर आली आहे.