राज्यस्तरीय व्हॉलीबॉल स्पर्धेच्या बदलापूरमधील जय्यत तयारीची जिल्हाधिकाऱ्यांकडून झाडाझडी

राज्य शासनाने या स्पर्धेच्या अनुदानात ५० लाखांवरून थेट ७५ लाखांपर्यंत वाढ केल्याने यंदाचे आयोजन अधिक भव्य होणार आहे.

ठाणे : बदलापूर जिमखाना मैदानावर होणाऱ्या ‘छत्रपती शिवाजी महाराज चषक राज्यस्तरीय व्हॉलीबॉल स्पर्धा २०२५-२६’ स्पर्धेच्या तयारीचा जिल्हाधिकारी डॉ. श्रीकृष्ण पांचाळ यांनी थेट आढावा घेत संबंधित यंत्रणांना काटेकोर नियोजनाचे आदेश दिले. स्पर्धा केवळ औपचारिक न राहता क्रीडा महोत्सवाच्या दर्जाची व्हावी, असा स्पष्ट निर्देश त्यांनी आजच्या बैठकीत दिला.

राज्य शासनाने या स्पर्धेच्या अनुदानात ५० लाखांवरून थेट ७५ लाखांपर्यंत वाढ केल्याने यंदाचे आयोजन अधिक भव्य होणार आहे. मात्र निधी वाढीसोबतच दर्जाही उंचावला गेला पाहिजे, अन्यथा जबाबदारी निश्चित केली जाईल, असा इशारा त्यांनी संबंधिताना या बैठकीत दिला आहे.

स्पर्धा १३ ते १७ मेदरम्यान रंगणार आहे. स्पर्धेत १९ व २१ वर्षांखालील मुला-मुलींचे ३२ संघ सहभागी होणार असून सुमारे ५४८ खेळाडू, प्रशिक्षक व अधिकारी ठाण्यात दाखल होणार आहेत. खेळाडूंची निवास, भोजन, वाहतूक, सुरक्षा आणि मैदानावरील प्रकाशयोजना यावर विशेष भर देण्याचे आदेश देण्यात आले.

विजेत्यांच्या बक्षीस रकमेचे वितरण, भत्ते व प्रवास खर्च पारदर्शक पद्धतीनेच व्हावेत, असेही जिल्हाधिकाऱ्यांनी स्पष्ट केले. प्रशासन, पोलीस आणि स्थानिक स्वराज्य संस्थांनी समन्वयाने काम करत ठाण्याची क्रीडा व आदरातिथ्य परंपरा जपावी, असे आवाहनही जिल्हाधिकाऱ्यांकडून यावेळी करण्यात आले आहे.