आमचा बाप व्हायचा प्रयत्न केला, तर त्याला त्याचा बाप दाखवून देऊ; मंत्री गणेश नाईकांचा इशारा

अंबरनाथ नगरपालिकेच्या निवडणुकीच्या अनुषंगाने आयोजित भाजप पदाधिकाऱ्यांच्या बैठकीला संबोधित करण्यासाठी नाईक अंबरनाथमध्ये आले होते.

अंबरनाथ - नगरपरिषदेवर यंदा भाजपचीच सत्ता येणार, कोणाची इच्छा असो किंवा नसो अंबरनाथ शहराचा, ठाणे जिल्ह्याचा विकास मुख्यमंत्री देवेंद्र फडणवीस आणि जिल्ह्याचा संपर्क प्रमुख म्हणून आम्हीच करू, जर कोणी प्रेमाने समजावून सांगितलं तर त्याला गाडीत जागा नसताना अडचण सहन करून जागा देऊ, मात्र कोणी जर बाप व्हायचा प्रयत्न करत असेल तर त्याला त्याचा बाप दाखवल्याशिवाय राहणार नाही, असा सज्जड दम राज्याचे वनमंत्री गणेश नाईक यांनी कोणाचेही नाव न घेता भाजप कार्यकर्त्यांच्या बैठकीत शुक्रवारी विरोधकांना दिला.

अंबरनाथ नगरपालिकेच्या निवडणुकीच्या अनुषंगाने आयोजित भाजप पदाधिकाऱ्यांच्या बैठकीला संबोधित करण्यासाठी नाईक अंबरनाथमध्ये आले होते. यावेळी त्यांनी भाजपच्या स्थानिक पदाधिकारी, कार्यकर्त्यांशी संवाद साधताना यंदा अंबरनाथ, बदलापूर शहरात भाजपचीच सत्ता येणार. तसेच नवी मुंबई प्रमाणे शहराचा विकास करण्यासाठी अंबरनाथ शहर दत्तक घेत असून सहा महिन्यांत शहरात परिवहन सेवा सुरू करणार, असा विश्वास त्यांनी व्यक्त केला. यावेळी सतर्क राहा, रात्र वैऱ्याची आहे, असा कानमंत्रही दिला. येथील पोलिस उपायुक्तांशी बोलणे केले आहे, त्यांना सांगितले आहे ज्या वार्डात जे गुंड दहशत माजवून मस्ती करतील ते रेकॉर्डला द्या. भाजपच्या नव्हे तर आघाडीच्या लोकांवर देखील अन्याय होता कामा नये, कुठे गुंडागर्दी झाली तर चिंता करू नका, पोलिसांमार्फतच बंदोबस्त करू, तुमच्या सोबत पूर्ण ताकदीने उभा आहे, असा विश्वास भाजप कार्यकर्त्यांना नाईक यांनी दिला.

अंबरनाथ- बदलापूरच्या स्वतंत्र महापालिका करू

मागील काही वर्षे सतत चर्चेत असलेल्या अंबरनाथ-बदलापूर एकत्र महापालिका करण्याबाबत मंत्री नाईक यांनी स्पष्टीकरण दिले. माझ्या मनात अंबरनाथ-बदलापूर एकत्रित महापालिका करावी, अशी संकल्पना होती. मात्र कुळगाव बदलापूरची लोकसंख्या इतकी आहे की, त्यांचीच स्वतंत्र महानगरपालिका होऊ शकते, ही बाब आ. किसन कथोरे यांनी निदर्शनास आणली. अंबरनाथची देखील स्वतंत्र महापालिका होण्याइतकी लोकसंख्या आहे. त्यामुळे दोन्ही शहरांच्या स्वतंत्र महापालिका होण्यासाठी प्रयत्न करू, असे नाईक यांनी स्पष्ट केले.