पॅरिस - अमेरिकेच्या द्वितीय मानांकित कोको गाॅफने शानदार कामगिरी करताना शनिवारी अंतिम लढतीत बेलारूसच्या अग्रमानांकित आर्यना सबालेंका हिच्यावर रोमांचक विजय मिळवताना फ्रेंच ओपन ग्रँडस्लॅम टेनिस स्पर्धेत महिला एकेरीचे विजेतेपद पटकावले. गाॅफचे हे एकेरीतील पहिलेच फ्रेंच ओपन ग्रँडस्लॅम विजेतेपद आहे. २०२४मध्ये तिने फ्रेंच ओपनमध्ये दुहेरीचे विजेतेपद पटकावले होते. याआधी गाॅफने २०२३मध्ये अमेरिकन ओपनच्या अंतिम लढतीत एका सेटच्या पिछाडीवरून सबालेंकालाच पराभूत करत विजेतेपद पटकावले होते.
कोको गाॅफने दोन तास ३८ मिनिटे रंगलेल्या रोमांचक लढतीत सबालेंकावर ६-७ (५-७), ६-२, ६-४ असा शानदार विजय मिळवला. टायब्रेकरमध्ये पहिला सेट गमावल्यानंतर गाॅफने दमदार पुनरागमन करताना संस्मरणीय विजय साकारला. २०१३ नंतर पहिल्यांदाच पॅरिसमध्ये अग्रमानांकित आणि द्वितीय मानांकित यांच्यात अंतिम सामना रंगला. २०१३मध्ये सेरेना विलियम्सने मारिया शारापोव्हाला पराभूत केले होते. गेल्या ३० वर्षांत हा पहिल्या दोन खेळाडूंमधील केवळ दुसरा सामना ठरला. गॉफच्या दुसऱ्या मॅच पॉइंटवर सबालेंकाने बॅकहँड वाइड पाठवल्यानंतर २१ वर्षीय गाॅफ पाठीवर पडून दोन्ही हातांनी चेहरा झाकून घेत तिने जल्लोष केला. सबालेंकाने गाॅफचे अभिनंदन केल्यानंतर तिने फिल्म डायरेक्टर स्पाइक ली यांची गळाभेट घेत सहकाऱ्यांसह आनंद साजरा केला. सबालेंकाने निर्णायक सेटमध्ये आक्रमक सुरुवात केली. पहिला सर्व्हिस गेम राखण्यासाठी तिने जोखीम घेतली. तिसऱ्या सेटमध्ये गॉफने खेळ उंचावताना उत्कृष्ट रॅली जिंकली.
तिसऱ्या सेटमध्ये गाॅफने राखले सातत्य
गॉफने बेसलाइनपासून सातत्य राखले आणि ब्रेक पॉइंट मिळवला, जो तिने सबालेंकाच्या दुहेरी चुकीवर रूपांतरित केला. ज्यामुळे गाॅफला २-१ अशी आघाडी मिळाली. सबालेंकाने निराशा व्यक्त केली पण त्यानंतर तिने सामना ३-३ असा बरोबरीत आणला. गॉफने दोनदा सबालेंकाची सर्व्हिस ब्रेक करत वर्चस्व गाजविले.
चाहत्यांच्या प्रेमामुळेच जिंकले : गाॅफ
गाॅफ म्हणाली की, आज या गर्दीने मला खरोखर मदत केली. तुम्ही मला प्रोत्साहन देत होता आणि त्यामुळे माझा उत्साह द्विगुणित झाला. त्यामुळेच मी आज येथे जिंकू शकले.