नवी दिल्लीतील AI समिटमधून बिल गेट्स यांची माघार! 'या' वादग्रस्त प्रकरणामुळे घेतला मोठा निर्णय; आता अंकुर वोरा मांडणार भूमिका

Bill Gates skip AI Summit Delhi : एपस्टीन केसमध्ये नाव आल्याने बिल गेट्स यांनी दिल्लीतील भाषणातून माघार घेतली आहे. त्यांच्या जागी आता अंकुर वोरा मार्गदर्शन करणार आहेत.

नवी दिल्लीत सुरू असलेल्या भव्य 'इंडिया AI इम्पैक्ट समिट २०२६' मध्ये एक मोठी घडामोड समोर आली आहे. मायक्रोसॉफ्टचे सह-संस्थापक बिल गेट्स या परिषदेत आपले मुख्य भाषण देणार नाहीत, अशी माहिती गेट्स फाउंडेशनने दिली आहे. अमेरिकेतील गाजलेल्या 'एपस्टीन केस'च्या फाईल्समध्ये नाव आल्याने हा निर्णय घेण्यात आल्याची चर्चा आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

गेट्स फाउंडेशनने दिलेल्या स्पष्टीकरणानुसार, समिटचे संपूर्ण लक्ष नियोजित प्राधान्यक्रमांवर राहावे, यासाठी बिल गेट्स यांनी बाजूला होण्याचा निर्णय घेतला आहे. मात्र, जाणकारांच्या मते अमेरिकन गुन्हेगार जेफ्री एपस्टीन याच्याशी संबंधित गुप्त दस्तऐवज सार्वजनिक झाल्याने बिल गेट्स वादाच्या भोवऱ्यात सापडले आहेत. या फाईल्समध्ये गेट्स आणि एपस्टीन यांच्यात जवळचे संबंध असल्याचा दावा करण्यात आला आहे. गेट्स यांनी यापूर्वीच या मुलाखतींवर खेद व्यक्त करत माफी मागितली आहे.

अंकुर वोरा भूषवणार जबाबदारी
बिल गेट्स यांच्या अनुपस्थितीत आता अंकुर वोरा गेट्स फाउंडेशनची बाजू मांडतील. अंकुर वोरा हे फाउंडेशनच्या आफ्रिका आणि भारत कार्यालयांचे अध्यक्ष आहेत. ते आजच्या सत्रात कृत्रिम बुद्धिमत्ता आणि सामाजिक विकास या विषयावर विचार मांडणार आहेत.

दिग्गजांची माघार आणि उपस्थिती
केवळ बिल गेट्सच नाही, तर एनवीडियाचे सीईओ जेंसेन हुआंग यांनीही या समिटचा दौरा रद्द केला आहे. दुसरीकडे, गुगलचे सीईओ सुंदर पिचाई आणि ओपन-एआयचे सॅम ऑल्टमॅन या परिषदेत सहभागी होत आहेत. पंतप्रधान नरेंद्र मोदी यांनी १६ फेब्रुवारी रोजी या समिटचे उद्घाटन केले होते. 'सर्वजन हिताय, सर्वजन सुखाय' या संकल्पनेवर आधारित ही परिषद २० फेब्रुवारीपर्यंत भारत मंडपम येथे चालणार आहे.