धक्कादायक; कोरोनाची लक्षणे असतानाही उपचारास न नेल्याने पत्नीचा मृत्यू

मंगळवेढा तालुक्यातील घटना; सासूच्या तक्रारीवरून पतीविरूध्द गुन्हा दाखल

मंगळवेढा : कोरोना रोगाची लक्षणे दिसत असतानाही पतीने तीला वेळेत उपचारास दाखल न करता तीला क्रूर वागणूक देवून छळ केल्याप्रकरणी सासूच्या फिर्यादीवरून जावई लिंगराज दामू पवार (रा. साईनिवास तुकाईनगर, मंगळवेढा) याच्याविरूध्द गुन्हा दाखल झाला आहे.

पोलिस सुत्रांनी दिलेली माहिती अशी, यातील फिर्यादी उमा शंकर चव्हाण(वय 69 रा. नेहरू नगर सोलापूर) यांची मुलगी तथा मयत अश्‍विनी हिचा विवाह 14 मे 2005 रोजी आरोपी लिंगराज दामू पवार याच्याबरोबर झाला होता. जावई लिंगराज हे आरोग्य खात्यात नोकरीस होते.  मयतास 24 फेब्रुवारी 2006 रोजी मुलगी झाली होती. मुलगी झाल्याच्या कारणावरून जावई लिंगराज हे नाराज असल्याने वारंवार मयतास उपाशी ठेवून मुलगा होण्यासाठी  त्रास देवून मी दुसरे लग्न करणार आहे,तु घटस्फोट दे नाही तर तुला खलास करून टाकीन अशी दमदाटी करत असे. तदनंतर मंगळवेढयातील प्रतिष्ठित लोकांकडून आरोपीस समज देण्यात आली होती. त्यामुळे काही दिवस  व्यवस्थित नांदवले. दि.15 एप्रिल 2021 रोजी मयत अश्‍विनी हिस श्‍वास घेता येत नव्हता, तीच्या रक्ताच्या उलटया झाल्या,तीला उपचारास घेवून जावा असे फिर्यादीने पाया पडून सांगितले तरीसुध्दा उपचारास नेले नाही.

दि.22 एप्रिल रोजी मयत अश्‍विनी हिस बेळगाव येथील के.एल.ई. हॉस्पीटलमध्ये दाखल केले. मात्र दि. 29 रोजी संध्याकाळी 8.40 च्या दरम्यान ती मयत झाली. त्यानंतर फिर्यादीचे  जावई  तथा आरोपी लिंगराज दामू पवार याने मंगळवेढयात येवून अश्‍विनीच्या दवाखान्याची कागदपत्रे जाळून टाकली. व नात श्रध्दा हिस कोणास काही एक सांगू नको म्हणून दमदाटी केली. तसेच तुम्ही कोठे तक्रार केली तर तुम्हाला सोडणार नाही अशी धमकी दिली.

मयत अश्‍विनी हिस कोरोना रोगाची लक्षणे दिसत असतानाही तीला वेळेत उपचारार्थ दाखल न केल्यानी ती मयत झाली असल्याचे दिलेल्या फिर्यादीत म्हटले आहे. अधिक तपास शहर बीटचे पोलिस करीत आहेत.