हेमंत सानप यांची माहिती
बनावटगिरीला लागेल लगाम
लोकमत न्यूज नेटवर्क
सोलापूर : राज्य शासनाने राज्यातील मिळकत पत्रिका (प्रॉपर्टी कार्ड) ऑनलाईन (डिजिटलायझेशन) करण्याचे काम हाती घेतले. सोलापूर जिल्ह्यात २ लाख ९९ हजार ६५४ मिळकतपत्रिका असून, याचे ९४ टक्के काम पूर्ण झाल्याची माहिती भूमी अभिलेख विभागाचे जिल्हा अधीक्षक हेमंत सानप यांनी दिली.
जिल्ह्यात प्रत्येक तालुक्याच्या ठिकाणी जमिनीची मोजणी करून देणे आणि नगर भूमापन (सिटी सर्व्हे) झालेल्या मिळकतीवर फेरफार नोंदणी करण्यासाठी उपअधीक्षक भूमी अभिलेख कार्यालय आहे. जिल्ह्यातील ११ तालुक्यांमधील ३५३ गावात सिटी सर्व्हे झाला आहे. जिल्ह्यातील परिरक्षण भूमापकाचे काम झाले असून, अंतिम तपासणी करून लवकरच सर्व मिळकतपत्रिका जनतेला ऑनलाईन उपलब्ध होतील, असे सानप यांनी सांगितले.
जिल्ह्यात २ लाख ९९ हजार ६७४ मिळकतपत्रिकांची तपासणी लवकरच करण्यात येणार आहे. जिल्ह्यातील १ लाख १२ हजार ७७५ मिळकतपत्रिकांच्या डिजिटल स्वाक्षरीचे काम पूर्ण झाले असल्याने मिळकतदारांना लवकरच ऑनलाईन मालमत्ता पाहता येणार आहे, असेही त्यांनी सांगितले.