'माझ्या हत्येच्या कटाचे मास्टरमाईंड धैर्यशील मोहिते पाटील'; राम सातपुते यांचा गंभीर आरोप

माजी आमदार राम सातपुते यांच्या हत्येचा कट रचल्याचा दावा आधी ग्रामविकास मंत्री जयकुमार गोरे यांनी केला होता. त्यानंतर आज राम सातपुते यांनी स्वतः माध्यमांसमोर येत या प्रकरणावर आपली भूमिका स्पष्ट केली.

सोलापूर जिल्ह्याच्या राजकारणात मोठी खळबळ उडाली आहे. भाजपचे माजी आमदार राम सातपुते यांनी आपल्या हत्येचा कट रचला होता असा गंभीर आरोप करत, याचे मास्टरमाईंड खासदार धैर्यशील मोहिते पाटील आणि अर्जुनसिंह मोहिते पाटील असू शकतात, असा दावा केला आहे. या आरोपांमुळे राजकीय वर्तुळात मोठी खळबळ उडाली आहे.

"निवडणुकीत पैसा जिंकला, माणूस..."; कारेगावच्या माजी सरपंच निर्मला नवलेंचा नवीन व्हिडीओमध्ये काय?

माजी आमदार राम सातपुते यांच्या हत्येचा कट रचल्याचा दावा आधी ग्रामविकास मंत्री जयकुमार गोरे यांनी केला होता. त्यानंतर आज राम सातपुते यांनी स्वतः माध्यमांसमोर येत या प्रकरणावर आपली भूमिका स्पष्ट केली. सातपुते यांच्या मते, हा प्रकार 'कॉन्ट्रॅक्ट किलिंग'चा असून काही मारेकऱ्यांना सुपारी देण्यात आली होती.

या हत्येच्या कटाची कुणकुण लागताच पोलिसांनी सतर्कता दाखवली आहे. गेल्या तीन दिवसांपासून पोलीस माळशिरस तालुक्यात तळ ठोकून असून, काही संशयित व्यक्तींना ताब्यात घेऊन त्यांची कसून चौकशी केली जात आहे. पोलिसांना या कटाची आधीच माहिती मिळाली होती, त्यामुळे मोठा अनर्थ टळला," असेही सातपुते म्हणाले.

चिठ्ठीद्वारे मुख्यमंत्र्यांना दिली माहिती

आपल्या जीविताला असलेल्या धोक्याबाबत आणि या कटात कोणाचा सहभाग असू शकतो, यासंदर्भात राम सातपुते यांनी मुख्यमंत्री देवेंद्र फडणवीस यांना सांगितल्याची माहिती दिली.

मोहिते पाटलांवर थेट निशाणा

"या सर्व कटाचे सूत्रधार (मास्टरमाईंड) खासदार धैर्यशील मोहिते पाटील आणि अर्जुनसिंह मोहिते पाटील असू शकतात," असा थेट संशय राम सातपुते यांनी व्यक्त केला आहे. लोकसभा निवडणुकीनंतर सोलापूर जिल्ह्यात सातपुते आणि मोहिते पाटील यांच्यातील राजकीय संघर्ष टोकाला गेल्याचे या निमित्ताने पुन्हा एकदा दिसून येत आहे.

पोलिस तपास करत आहेत

“या प्रकरणी पोलीस खाते आणि राज्याचा गुप्तचर विभाग संयुक्तपणे चौकशी करत असून, तपासादरम्यान काही बाबी त्यांच्या निदर्शनास आल्या आहेत. काही गुप्त माहितीही मिळाल्याचे समजते,” असे सातपुते यांनी स्पष्ट केले.

“ज्यांचे राजकीय अस्तित्व धोक्यात आले आहे, असे काही लोक एकत्र येऊन कट रचत असल्याचे चित्र पुढे येत आहे. माळशिरस तालुक्यातील काही लोकांचा यामध्ये सहभाग असण्याची शक्यता आहे. संबंधित व्यक्तींना चौकशीसाठी बोलावण्यात आले असून तपास सुरू आहे,” असे सातपुते यांनी सांगितले.

सातपुते म्हणाले, “मी एवढंच म्हटलं आहे की मोहिते–पाटील यांच्या संदर्भातील काही लोक अंगावर घालण्याचा प्रयत्न करत आहेत. माझा लढा हा पूर्णपणे संविधानिक मार्गाने सुरू आहे. लोकांचे कारखाने बुडवणारे आणि जनतेला देशोधडीला लावणारे लोक जर सर्वसामान्य घरातून आलेल्या राम सातपुते यांच्या हत्येचा कट रचत असतील, तर आमचं नेतृत्व याची नक्कीच योग्य ती दखल घेईल.”