गुडेवारांच्या निर्णयाला सत्ताधाऱ्यांचा दणका

प्र. परिवहन व्यवस्थापकास हटविले : पदभार जावळेंकडे

सोलापूर : महापालिका आयुक्त चंद्रकांत गुडेवार यांनी अधिकाराचा वापर करून तात्पुरत्या स्वरुपात नियुक्त केलेले परिवहन व्यवस्थापक प्रदीप खोबरे यांना पदमुक्त करुन परिवहनचा पदभार सहायक आयुक्त पंकज जावळे यांच्याकडे देण्याचा निर्णय गुरूवारी झालेल्या महापालिकेच्या सभेत बहुमताने घेण्यात आला.महापालिकेची ५ मे रोजी तहकूब झालेली सभा महापौर अलका राठोड यांच्या अध्यक्षतेखाली पार पडली. महापालिका आयुक्त चंद्रकांत गुडेवार यांनी परिवहनचा गाडा सुरळीत चालावा म्हणून राज्य परिवहन महामंडळातून निवृत्त झालेले प्रदीप खोबरे यांची तात्पुरत्या स्वरूपात मानधनावर नियुक्ती केली होती. या नियुक्तीचा विषय सभागृह नेते महेश कोठे यांनी सभागृहापुढे मांडला. आयुक्तांनी तात्पुरत्या स्वरूपात परिवहन व्यवस्थापक नियुक्त करताना चुकीच्या पद्धतीचा अवलंब केला. वास्तविक हे पद नेमण्याचा आयुक्तांना अधिकार नाही. त्यामुळे प्रभारी परिवहन व्यवस्थापक प्रदीप खोबरे यांना पदमुक्त करून त्यांच्या जागी नवीन पद कायमस्वरूपी भरावे. तोपर्यंत पठाण यांच्याकडे पदभार द्यावा. नवीन बस खरेदीचा विषय सभागृहाच्या मान्यतेने व्हावा अशी सूचना मांडली. जगदीश पाटील यांनी सूचनेला मान्यता दिल्यावर अ‍ॅड. यु. एन. बेरिया उठले व त्यांनी विरोधकांच्या भूमिकेबद्दल आश्चर्य व्यक्त करून परिवहन व्यवस्थापक नियुक्तीचा महापालिका आयुक्तांना अधिकार आहे काय? असा मुद्दा उपस्थित केला. त्यावर जगदीश पाटील यांनी परिवहनची स्थिती वाईट आहे. परिवहनचा गाडा सुरळीत चालावा म्हणून विषयाला मान्यता दिली असा खुलासा केला. मात्र आनंद चंदनशिवे यांनी बेरिया यांच्या आरोपाला आक्षेप घेतला. खोबरे यांची नियुक्ती बेकायदेशीर नाही. त्यांनी हा विषय परिवहन समितीसमोर आणलेला आहे असे निदर्शनाला आणून दिले. त्यावर कोठे यांनी परिवहनमध्ये चाललेल्या अनेक बेकायदेशीर बाबी चव्हाट्यावर आणल्या. नवीन बस येणार म्हणून प्रभारी व्यवस्थापकाने चालकाची भरती सुरू केली आहे. दोन पदे निर्माण केली. वाल्व्हो बस परवडत नाही म्हणून मी आधीच सांगितले होते. असे असतानाही आयुक्त गुडेवार यांनी बस खरेदीसाठी सभागृहाची परवानगी न घेता महापालिकेच्या तिजोरीतून आठ कोटी परस्पर घेतले, असे निदर्शनाला आणून दिले.--------------थीम पार्कला मंजुरीकेगाव येथील शिवाजीनगरात केंद्र व राज्य शासनाच्या अनुदानातून उभारण्यात येणाऱ्या १00 कोटी खर्चाच्या थीम पार्क व अ‍ॅम्युजमेंट पार्कची योजना राबविण्यास मंजुरी देण्यात आली. या प्रकल्पाचा अहवाल तयार करण्यासाठी तांत्रिक सल्लागार म्हणून पुण्यातील सायन्स अ‍ॅन्ड टेक्नॉलॉजीस मान्यता देण्यात आली.------------------गुडेवारांना विरोध नाहीसभेत सभागृह नेते महेश कोठे, अ‍ॅड. यु. एन. बेरिया यांनी गुडेवारांची आम्ही बदली केली नाही व त्यांना विरोधही नाही. त्यांनी पुन्हा येऊन काम करावे. पण मनमानी व बेकायदेशीर बाबींचा अंमल आम्ही खपवून घेणार नाही. कामकाज कायद्याप्रमाणेच झाले पाहिजे, असा आमचा आग्रह असल्याचे ठासून सांगितले.------------------------एलबीटीचे काय झाले...जीवनावश्यक अन्नधान्य व कडधान्य, तेलबियांना एलबीटीतून सूट देण्याचा निर्णय एकमताने घेण्यात आला. यावर चर्चा करताना महापौर अलका राठोड यांनी व्यापाऱ्यांच्या बैठकीत जाणून घेतलेल्या मतांवरून एलबीटी, जकात हटवून महापालिकेच्या हिताचा निर्णय घ्यावा, असा अहवाल मुख्यमंत्र्यांना दिल्याचे सांगितले.