पर्यटन प्रकल्पाचे स्वागतच

आरोंदा जेटीला विरोधच : आरोंदा ग्रामस्थांनी मांडली भूमिका

सावंतवाडी : आरोंदा बंदर प्रकल्प कोणी कितीही अट्टाहास केला, तरी होणार नाही. जर त्यांनी बंदर प्रकल्प रद्द करून पर्यटन प्रकल्प आणला, तर त्यांचे स्वागतच करू, अशी भूमिका आरोंदावासीयांनी मांडली. आम्हाला अजून किती गुन्ह्यात अडकवणार आहात, असा सवालही विश्वनाथ नाईक, मनोहर आरोंदेकर, प्रशांत तारी, गोविंद मोटे आदींनी केला.ते सावंतवाडी येथे आयोजित पत्रकार परिषदेत बोलत होते. यावेळी शिक्षण सभापती गुरू पेडणेकर, अंकुश जाधव, कॉग्रेस प्रवक्ते डॉ. जयेंद्र परूळेकर, तालुकाध्यक्ष संजू परब, सभापती प्रमोद सावंत, संदीप नेमळेकर, संदीप सुकी, संतोष गावस, दिलीप भालेकर उपस्थित होते.यावेळी आरोंदा ग्रामस्थ म्हणाले, गावातील प्रमुख मंडळी एकत्र असून हातावर मोजण्याइतकेच लोक या प्रकल्पाच्या बाजूने आहेत. गावात एकी असून ती कायम राहणार आहे. माजी आमदार प्रमोद जठार हा प्रकल्प समन्वयातून सुरू करू असे म्हणतात. पण आम्हाला जेटी प्रकल्प नकोच आहे. त्यामुळे समन्वयाचा प्रश्नच नाही. जर तेली जेटी प्रकल्प रद्द करून पर्यटन प्रकल्प आणत असतील, तर त्यांचे स्वागतच करू, अशी भूमिकाही यावेळी ग्रामस्थांनी मांडली. आरोंदा येथे पोलिसांनी लाठीमार केला. तेली समर्थकांनी दगडफेकही केली. मग आमच्यावर तक्रारी का दाखल केल्या. त्यामुळे पोलीस अजून किती गुन्हे दाखल करणार आहेत, असा सवालही ग्रामस्थांनी केला. जेटीला विरोध आमचा कायम राहणार असून, जेटीच्या विरोधात कोणी मदत करत असेल, तर त्यांची मदतही घेऊ. पण जेटी होऊ देणार नाही, असे यावेळी ग्रामस्थांनी ठणकावून सांगितले. नारायण राणे यांनी जी मदत केली, ती आम्ही कधीच विसरणार नाही. त्यांचे गावात सर्वत्र कौतुक होत असून राणे यांच्यावर आमचा पूर्ण विश्वास असल्याचे ही त्यांनी स्पष्ट केले. (प्रतिनिधी)२८ जणांवर प्रतिबंधात्मक कारवाईसावंतवाडी : आरोंदा येथे बंदर कंपनी विरोधात केलेल्या आंदोलनावेळी झालेल्या दगडफेक प्रकरणी पोलिसांनी कंपनी समर्थक व विरोधक अशा २८ जणांवर प्रतिबंधात्मक कारवाई केली आहे. यात कंपनी समर्थकांत १० जण, तर विरोधकांमधील १८ जणांवर ही कारवाई केली आहे. सोमवारी ५ जानेवारी रोजी आरोंदा येथे स्थायी समितीचे पदाधिकारी बंदराची पाहणी करण्यासाठी गेले होते. त्यांच्या सोबत ग्रामस्थ होते. बंदराची पाहणी करून येत असतानाच जेटी कंपनीचे समर्थक आपल्या जागेत उभे असल्याचे पाहून विरोधात ग्रामस्थांनी घोषणा दिल्या. त्यातून दगडफेक झाली. पोलिसांनी दोन्ही बाजूच्या तक्रारींवरून २८ जणांवर गुन्हे दाखल करून त्यांना अटक केली.या सर्वांवर सावंतवाडी पोलिसांनी पुन्हा प्रतिबंधात्मक कारवाई केली आहे. कंपनीचे संचालक माजी आमदार राजन तेली, समर्थक काका कुडाळकर, राजन आरोंदेकर, गोपाळ नाईक, ज्ञानदेव नाईक, संतोष खोबरेकर, श्रीकृष्ण खोबरेकर, संतोष नाईक, राजेश पेडणेकर, सिध्देश नाईक यांचा यामध्ये समावेश होता. कंपनी विरोधात जिल्हा परिषद अध्यक्ष गोट्या सावंत, जिल्हाध्यक्ष सतीश सावंत, डॉ. जयेंद्र परूळेकर, तालुकाध्यक्ष संजू परब, चंद्रकात गावडे, संदीप कुडतरकर, सभापती अंकुश जाधव, गुरू पेडणेकर, राजेश नाईक, विद्याधर नाईक, मंदार नार्वेकर, मनोहर आरोंदेकर, गजानन कुबल, दिगंबर नाईक, प्रशांत नाईक, प्रशांत तारी, सुधाकर नाईक, दिगंबर मोटे यांचा समावेश आहे. या सर्वांना सावंतवाडी तहसीलदारांसमोर हजर करण्यात येणार आहे. प्रमोद जठारांची भूमिका फसवीच : उपरकरकणकवली : सत्तेत गेल्यानंतर व राजन तेली यांनी भाजपात प्रवेश केल्यानंतर आरोंदा जेटीबाबत माजी आमदार प्रमोद जठार यांची भूमिका बदलली आहे. ही शुद्ध फसवणूक असून हे जनता कधीही सहन करणार नाही, अशी टीका मनसेचे कोकण विभागीय संघटक माजी आमदार परशुराम उपरकर यांनी केली. येथील संपर्क कार्यालयात आयोजित पत्रकार परिषदेत ते बोलत होते. उपरकर म्हणाले, आरोंदा जेटीचा प्रश्न तापत असताना सत्ताधारी पक्षाच्या दोन विविध भूमिका समोर आल्या आहेत. लाठीहल्ला झाल्यावर पालकमंत्री आरोंदा येथील ग्रामस्थांना भेटले नाहीत. मात्र खासदार विनायक राऊत गेले आणि हा जेटी प्रकल्प सत्ता असली तरी रद्द करू शकत नाही. न्यायालयात जावे लागेल, असे सांगितले. सत्तेत असून युतीचे खासदार अशी वक्तव्ये करीत आहेत. जठारांनी जेटीचा प्रश्न सामंजस्याने सोडविला जाईल, असे सांगून जेटीला पाठींबाच दिला आहे. आम्ही जेटीला विरोध करताना व्यक्तीद्वेषातून केला नाही. साडेतीनशे मच्छिमार यामुळे उद्ध्वस्त होणार असल्यामुळेच हा विरोध केला. आमदार असताना त्यांनी एकदातरी माहिती घेतली का? सामंजस्याने हा प्रश्न सुटणार असता तर मच्छिमारांवर लाठी खाण्याची वेळ का आली. जेटीमुळे एका-दोघांचे पोट भरणार असून अनेकजण उद्ध्वस्त होतील, हे जठारांनी लक्षात घ्यावे, असे उपरकर म्हणाले. (वार्ताहर) ...मग मायनिंगचेही समर्थन करणार काय ?जेटीबाबत भूमिका बदलणाऱ्या प्रमोद जठार यांनी आतापर्यंत मायनिंगविरोधात भूमिका घेतली होती. आगामी काळात मायनिंग करणारे भाजपात आले तर त्यांचे समर्थन करणार का? हे प्रथम जाहीर करावे, असेही उपरकर म्हणाले.